Baş verə olayla bağlı müəssisə səlahiyyətlisinin problemin varlığına yanaşması, bizdə belə bir qənaətin formalaşmasına səbəb oldu ki, rəhbərliyi insanların taleyi deyil, daha çox asan yolla qazanc əldə etmək düşündürür

Bu gün ölkə əhalisinin ərzaq təhlükəsizliyinin ödənilməsi ilə bərabər, onun keyfiyyətliliyinin təminatı da olduqca əhəmiyyət kəsb edən məsələlərdəndir. Elə bu səbəbdən də, son vaxtlar aidiyyəti qurumlar tərəfindən bu yöndə əməli addımlar atılmaqdadır. Başlıca məqsəd, əhalinin yüksək keyfiyyətli qida məhsulları ilə təminatını ödəmək və bu yöndə əmələ gələn hər cür çatışmazlıqları aradan qaldırmaqdır. Atılan addımlara baxmayaraq, hal-hazırda elə müəssisələr var ki, istər istehsal prosesində, isrərsə də satışını həyata keçirdiyi mallar üzərində nəzarətini lazımınca yerinə yetirmirlər. Belə müəssisələrdən biri də, Gəncə şəhəri Totanlı küç. ev-93 ünvanında fəaliyyət göstərən “Narınqala EL-Azəri” MMC-dir.
Müəssisənin fəaliyyəti barədə kifayət qədər məlumata malik olmasaq da, hələ bir müddət bundan əvvəl baş verən olay, nəzər-diqqətimizi cəmiyyətin fəaliyyətinə yönəltməyə sövq etdi. Belə ki, 18 iyun 2015-ci il tarixdə Yevlax Mərkəzi Bazarının qarşısında “Narınqala EL-Azəri” MMC-nin istehsal etdiyi və səyyar yolla satışını həyata keçirən şəxsdən alınan “Smit”, çox keçmir ki, 12 yaşlı Nağızadə Nihad Mübariz oğlunun zəhərlənməsinə səbəb olur. Nihad Nağızadənin şəhərin Üzeyir Hacıbəyov-117 ünvanında yaşayan valideyinləri bizimlə söhbətində bildirdilər ki, “həmin gün “Smit”i yeyən uşağın vəziyyəti olduqca dəyişdi və tempraturu getdikcə artdı. Vəziyyətin ağırlığını görüb dərhal uşağı Yevlax şəhər Uşaq Xəstəxanasına aparmağa məcbur olduq. İlk həkim baxışı zamanı bəlli oldu ki, Nihad Nağızadədə zəhərlənmə hadisəsi baş verib. Buna səbəb, uşağın “Smit”i yeməsi göstərildi və bununla bağlı həkimlər tərəfindən müalicə resepti də təyin olundu.
Diqqəti cəlb edən hal odur ki, baş verən hadisə ilə bağlı Nihad Nağızadənin atası Mübariz Nağızadə, Yevlax Mərkəzi Bazarının qarşısında “Smit”in səyyar satışını həyata keçirən şəxsə iradını bildirərkən, həmin an bazarda müdir müavini vəzifəsini daşıyan şəxs də hadisədən xəbərdar olur. Və çox keçmədən “Smit”in Yevlax şəhəri üzrə yayımını təşkil edən Ramil adlı şəxsə zəng edib bildirir ki, “satdığınız məhsul Nihad Nağızadə adlı uşağın zəhərlənməsinə səbəb olub” deyə, xəbərdarlığını çatdırır. Təəssüf doğuran hal o olur ki, Ramil adlı şəxs bazara gəlib zəhərlənmə hadisəsi ilə bağlı lazımi məlumatları öyrənmək əvəzinə, qaçıb gizlənməyə üstünlük verir.
Baş verən hadisədən sonra apardığımız araşdırmalar, bizə lazımi məlumatları əldə etməyə imkan verdi. Əvvəla onu qeyd edək ki, 18 iyun tarixdə Nihad Nağızadənin yediyi “Smit”in üzərində istehsal tarixi 09 iyun 2015-ci il, saxlanma müddəti isə 15 gün qeyd olunsa da, son anda zəhərlənmə hadisəsi baş verir. Bunula bağlı stasionar müalicə aparıldıqdan sonra, Nihad Nağızadənin vəziyyəti yaxşılığa doğru dəyişir. Əldə etdiyimiz məlumatlar sırasında o da bildirilir ki, “Smit”in istehsalı ilə məşğul olanlar, əvvəla üzərinə düşən vəzifə borcunu lazımınca yerinə yetirmirlər. Çünki, istər məhsulun istehsalında, yayımının təşkilində, satışını həyata keçirən səyyar satıcıların sağlamlıq durumlarının müəyyən olunmasında, onlarla əmək müqaviləsinin bağlanmasında, hansı şəraitdə saxlanılmasında, satışının həyata keçirilməsində, daha çox isti yay günlərində günəş şüalarından qorunmasında və.s, müəssisə rəhbərliyi tərəfindən nəzarətsizlik hökm sürür. Hələ vergidən yayınma halları ilə bağlı nələrin baş verməsi haqda bir söz demirik. Əgər bu belə olmasaydı, o halda Nihad Nağızadə zəhərlənmə ilə üz-üzə qalmazdı.
Baş verə olayla bağlı müəssisə səlahiyyətlisinə problemin varlığı ilə bağlı Nihad Nağızadənin atası Mübariz Nağızadənin etdiyi telefon zəngi də, heç də gözlənilən nəticəni verməyib. Çünki, həmin şəxsin “mən problemlərə cavabdehlik daşımıram, gedin problemlərinizi özünüz həll edin” deməsi diqqəti cəlb etdiyindən, bizlərdə belə bir qənaət formalaşdı ki, rəhbərliyi insanların taleyi deyil, daha çox qazanc əldə etmək düşündürür. Elə bu səbəbdən də, hər bir valideynə, yaşlı nəslin nümayəndələrinə və.s üzümüzü tutaraq bildiririk ki, “Smit”dən istifadə zamanı, xüsusilə də azyaşlı uşaqlar istifadə edərkən olduqca ehtiyatlı olun. Çalışın uşaqlarınızı “Smit” zəhərlənmələrindən qoruyun. Çünki, o həyat üçün həm də təhlükə mənbəyidir.