Əli Əliyev: “Pərakəndə düşmüş, vahid hədəfləri olmayan, heç olmasa fəaliyyətini koordinasiya etmək imkanı olmayan müxalifət bu günkü şərtlər daxilində vəziyyəti dəyişmək gücündə deyil”

“Radikal mübarizə üsulunu tərcih edənlərin mübarizə üsulları tərəfimizdən qeyri-effektiv kimi qiymətləndirilir”. Bunu Azərinfo.az-a açıqlamasında Vətəndaş və İnkişaf Partiyasının sədri Əli Əliyev bu günlərdə bir-birinin bəhsinə start verilən müxalif düşərgəsindəki mitinqlərin nə qədər effektiv olub-olmamasından danışarkən deyib. Onun sözlərinə görə, illər boyu müxalifət statusunda fəaliyyət göstərən təşkilat və liderlər ölkədə siyasi mübarizəni kəskin radikal şüarlar və vasitələrlə həyata keçirirlər: “Nəticə ortadadır. Onu deyim ki, onların siyasi qərarlarına, taktiki seçim hüququna sayğı ilə yanaşıram. Lakin hər bir iş nəticə ilə ölçülür. Əgər son 20 ildə məğlubiyyətlər sıralanırsa, deməli taktikaya yenidən baxmaq lazımdır. Etiraf edim ki, onlar bu 20 ildə ədalətli şərtlər daxilində keçirilən rəqabətdə uduzmayıblar. Hər dəfə seçkilərin nəticələri dəyişdirilib və real siyasi mənzərəni əks etdirməyib. Bütün bunlara rəğmən siyasi liderlər rəqabətə girdikdə , siyasi reallıqları tam halda qiymətləndirməli, siyasi nəticələrə təsir edən bütün amilləri göz önünə almalıdırlar. Çünki ölkənin və vətəndaşların həyatı məhz seçkilərin yekunundan asılı olur. Mitinq və digər statuslu kütləvi tədbirlər siyasi mübarizənin formalarından biri və qanuni yoludur. Təəssüf ki, son dövrlər keçirilən tədbirlər azsaylı və nəticəsizdir. Azərbaycanda kütləvi tədbir standartları ötən yüzilliyin sonlarında formalaşıb. O illərdə mitinq iştirakçılarının sayı 50 min iştirakçıdan az olmurdu. Ona görə, indiki 1000-1500 nəfərlik tədbirlər cəmiyyətin ovqatına təsir göstərmir. Ola bilər, biz bu ovqat dəyişikliyini görmürük . Kim hansı dəyişikliyi hiss edirsə, desin biz də, görək. Ölkədə siyasi dəngənin dəyişməsi təsirli addımlardan keçir. Pərakəndə düşmüş, vahid hədəfləri olmayan, heç olmasa fəaliyyətini koordinasiya etmək imkanı olmayan müxalifət bu günkü şərtlər daxilində vəziyyəti dəyişmək gücündə deyil. Ola bilər ki, kimlərsə siyasi mübarizədə məqsədi mitinq iştirakçılarının sayını artırmaqdır. Bizim qarşımızda belə vəzifə durmur”.


Gülçin