“Tofiq bəyin əfv edilməsi hakimiyyətin özünün də, xeyrinə olar”

Azərinfo.az-ın müsahibi Azadlıq partiyasının sədri Əhməd Orucdur:

-Əhməd bəy, hüquq müdafiəçisi Azad İsgəndərlinin dələduzluq üstündə həbsi ilə bağlı nə düşünürsüz?

-Bildiyimə görə, bu əmələ görə Azad isgəndərli əvvəllər bir dəfə də, mühakimə olunub. Allah kömək olsun. Təəssüf ki, bu cür "başbuğlar" da, olur...

-Əhməd bəy, bu aralar mitinq mitinq dalınca izlənilir. Eldəniz Quliyev deyir ki, o mitinqlərin böyük nəticəsi var və bu göz qabağındadır. Sizcə yalnız mitinqçilər tərəfindən görünən nəticəni, nə üçün heç kəs müşahidə etmir?

-Mitinq keçirmək hər bir vətəndaşın, qurumun hüququdur. Amma Milli Şuranın mitinq taktikası doğru deyil. Çünki bu mitinqlər müxalifəti parçalamağa yönəlib. Onlar kimlərəsə, onlardan başqa müxalifət olmadığı görüntüsü yaratmağa çalışırlar. Həmin aksiyaların nə millətə, nə müxalifətə zərrəcə xeyri yoxdur. Əksinə, olimpiya öncəsi ölkədə demokratiya görüntüsü yaratmaq üçün hakimiyyətin işinə yarayır. Səni masa arxasında sivil qaydada müzakirəyə dəvət edirlərsə, sən də normal müzakirədən imtina edib, öz tərəfdarlarınla yalançı hay-küy, nəlbəkidə fırtına yaradırsansa sənin niyyətinin başqa olduğu aydın görünür. Mitinqlər öləziyən xətlə davam edəcək, bir-iki aksiyadan sonra "sosial sifariş" olmayacaq.

-Tofiq Yaqublunu 7 günlüyünə azadlığa buraxdılar. Məlumdur ki, onun tamamilə azad olunmasından dolayı prezidentə çox sayda müraciətlər olunmaqdadır. Sizcə Tofiq Yaqublu azadlığa buraxılacaqmı?

-Tofiq bəyin, eləcə də, digər siyasi mənbusların azad olunması məsələsi hakimiyyət nümayəndəsi ilə müzakirələrdə detallı müzakirə olunub. Hesab edirəm ki, indiki şəraitdə Tofiq bəyin əfv edilməsi hakimiyyətin özünün də, xeyrinə olar. Tofiq bəyin heç bir günahı olmadığı, günahsız olaraq, uzun müddət həbsdə olması, baş verən ailə faciəsi bu adamı azad etməyin lazımlılığını bildirir. Ümumiyyətlə, məsələyə yanaşdıqda mən hesab edirəm ki, hakimiyyət bir sıra addımları atmaqda gecikir. Dialoqun nəticələrinin ortada olması, ölkədə gərginliyin ortadan götürülməsi, problemlərin həll olunması üçün hakimiyyət xoşgörülü mövqedə olmalıdır. Bir sıra məhbuslar əfv olunsa da, hesab edirəm ki, hakimiyyət gərginliyin azalması üçün daha ciddi addımlar ata bilər.





Ülkər