Nemət Kərimli: "Penitensiar Xidmət onun bu gün azad olunacağını desə də..."

Müsavat başqanının həbsdəki müavini Tofiq Yaqublu qızının dəfnində iştirak etmək üçün sabah səhər saatlarında 7 günlüyə azadlığa buraxılacaq. Penitensiar Xidmət bununla bağlı qərarının səbəbi kimi, mərhum Nərgiz Yaqublunun cənazəsinin sabah Azərbaycana gətiriləcəyini göstərib.

Bu barədə musavat.com-a vəkil Nemət Kərimli məlumat verib: "Sabah səhər saatlarında Tofiq bəy azad olunacaq. Penitensiar Xidmət onun bu gün azad olunacağını desə də, sonradan məsələnin həllinin sabaha qaldığını bildirdilər. Səbəb kimi onu göstərdilər ki, cənazə sabah gətiriləcək. Tofiq bəyin vaxtının sabahdan hesablanmasını və qızının yeddi mərasimində iştirak etməsinə şərait yaratmaq istədiklərini söylədilər".

Bəzi ehtimallara görə, Tofiq Yaqublunun gecə saatlarında buraxıla biləcəyi də istisna olinmur.

Qeyd edək ki, "Yeni Müsavat" qəzetinin əməkdaşı, Müsavat Partiyasının başqan müavini Tofiq Yaqublunun qızı Nərgiz Yaqublu bu gün səhər saatlarında Rusiyanın Tomsk şəhərində, müalicə olunduğu xəstəxanada vəfat edib.



http://musavat.com