Bayrağına hörmət etməyən şəxsin hörməti də olmaz. Bu atalar deyimi deyil. Amma reallığı əks etdirən bir deyimdir deyək. Bu günlərdə Regionxeber.az saytında Sabirabadda bayrağa hörmətsizlik olunması ilə bağlı bir süjet təqdim edilmişdi. Əslində diqqətimizi günlərdir Sabirabadda dalğalanan cırıq bayrağa rayon İcra Hakimiyyətinin laqeyid və biganə yanaşması oldu. Rayonda iş başında olmasından asılı olmayaraq, bu durumla icra başçısını əgər Bakıdan yol qət edən əməkdaşımız agah edirsə, o zaman bu icra başçısının da, fəaliyyətini gözdən keçirməyə dəyər. Millətimizin və xalqımızın hörmət və izzət göstərdiyi bir bayrağın Sabirabad icra hakimiyyətində kimlər üçün, nə səbəbdən mahiyyət daşımadığı doğurusu maraqlı gəldi. Elə bu məqsədlə əməkdaşımız Sabirabad rayon İcra Hakimiyyəti ilə dəfələrlə əlaqə saxlamağa çalışdı. Nəhayət Sabirabad rayon İcra Hakimiyyıətinin Hümanitar Məsələlər üzrə müavin vəzifəsində çalışan Babayeva Şəhnaz xanımla danışmaq mümkün olsa da, danışığımız çox qısa oldu. O söhbətdən qaçaraq dəstəyi üzümüzə qapatdı. Daha sonra əməkdaşımız icra hakimiyyətinə gedərək, həmin xanımdan bayraqla bağlı elementar suallara belə cavab ala bilməyib. Sabirabad rayon İcra Hakimiyyətində Hümanitar Məsələlər üzrə bir müavin bayrağın bir dövlət üçün mahiyyətinin nə olduğunu, rənglərinin nə ifadə etdiyini deyə bilmirsə, bu onun əlbəttə ki, “savadın”nın xəbərçisidir. İndi deyəsən, Sabirabad İcra Hakimiyyətinin rayonda günlərdir dalğalanan cırıq bayrağın fərqində belə olmamalarının səbəbi də, elə budur.
Görəsən bayraqla bağlı elementar suallar qarşısında aciz qalan İcra Hakimiyyətinin əməkdaşı həmin pilləyə hansı “savad” hesabına yiyələnib? Bax bunu adiyyatı orqanlar düşünsə heç də, pis olmaz.

Xatırladaq ki, dövlət bayrağa hörmət və dövlət bayrağının istifadə qaydaları ilə bağlı Azərbayacn Respublikasının Konstitusiyasında xüsusi maddə yer alıb. Həmin maddəni olduğu kimi nəzərinizə çatdırırıq:

Maddə 1. Azərbaycan Respublikasının Dövlət bayrağına hörmət göstərilməsi ilə bağlı vəzifələr
1.1. Azərbaycan Respublikasının vətəndaşları, habelə Azərbaycan Respublikasının ərazisində olan əcnəbilər və vətəndaşlığı olmayan şəxslər Azərbaycan Respublikasının Dövlət bayrağına hörmətlə yanaşmalıdırlar.

1.2. Azərbaycan Respublikası onun ərazisindən kənarda Azərbaycan Respublikasının Dövlət bayrağı barədə təhqiredici hərəkətlərin qarşısının alınması məqsədilə beynəlxalq hüquq normalarına uyğun olaraq tədbirlər görür.

1.3. Azərbaycan Respublikası əhali arasında Azərbaycan Respublikası Dövlət bayrağının mahiyyətinin və əhəmiyyətinin geniş təbliğ olunması, gənc nəslin Azərbaycan Respublikasının Dövlət bayrağına hörmət ruhunda tərbiyə edilməsi məqsədilə tədbirlər görür.


Mubariz Nuriyev