Türkiyə prezidenti Rəcəb Tayyib Ərdoğan axşam saatlarında Rusiya prezidenti Vladimir Putin ilə telefonla danışıb.

Azerinfo.az xəbər verir ki, prezident mənbələrindən "Timetürk"ə verilən məlumata görə, görüşdə ikitərəfli münasibətlərlə yanaşı, Ukrayna məsələsi də müzakirə olunub.

Prezident Ərdoğanın martın 20-də Ukraynaya edəcəyi səfərin də müzakirə olunduğu telefon danışığında , qondarma "erməni soyqırımı" iddialarından da danışılıb. Ərdoğanın bu məsələyə ədalətli şəkildə, tarix prizmasından yanaşılmasını istədiklərini, lakin, Ermənistanın konstruktiv danışıqlardan imtina etdiyini deyib.

Türkiyə prezidentinin telefon danışığı zamanı Ermənistanı sərt şəkildə ittiham etdiyi bildirilir.

İki lider arasındakı telefon danışığının təxminən 30 dəqiqə davam etdiyi öyrənilib.

Siyasi təhlilçilər Ərdoğanın qondarma "erməni soyqırımı"nın 100 illiyi ərəfəsində, bu barədə Putinlə sərt şəkildə danışması və erməniləri ittiham etməsini sıradan saymırlar. Hesab olunur ki, Putinin "erməni soyqırımı" ilə bağlı Ermənistanda təşkil olunan tədbirlərə qatılacağı haqqında açıqlaması, Ərdoğanın sərt üslubuna səbəb olub.