Xocalı qətliamının 23 ili geridə qaldı. Hər il olduğu kimi, bu il də ermənilərin azərbaycanlılara qarşı soyqırımını tanıtmaq üçün yürüşlər təşkil olundu, tədbirlər keçirildi, bu faşizmin Azərbaycana vurduğu zərərlərdən bəhs olundu.

Amma əvvəlki dövrlə müqayisədə diqqət çəkən bir nüans vardı - bu tədbirlər daha mütəşəkkil xarakter almış oldu. Artıq diaspor təşkilatları çırmanmır, o cümlədən azərbaycanlılar harda yaşamasından asılı olmayaraq, bir vətənpərvərlik nümayiş etdirir, hətta olduğu iş yerində, yaşadığı məhəllədə 3-5 nəfər də olsa toplaşıb, bu hadisəyə reaksiya verirlər.

İstər təşkilatlar, partiyalar, universitetlər olsun, istərsə də xaricdə yaşayan azərbaycanlılar, hər kəs bir vətəndaş olaraq missiyasını yerinə yetirməkdədir. Hətta Şotlandiyada təhsil alan azərbaycanlı gənclər də Xocalı faciəsini dünyaya tanıtmaq üçün yürüş ediblər. Təşkil edilən yürüşdə “Qlazqo” Universitetinin 20-yə yaxın tələbəsi iştirak edib.

Şəhərin mərkəzi küçələrində 1 saat davam edən yürüşdə “Justice for Xocali” (“Xocalıya ədalət”) şüarları səslənib. Artıq bütün dünya azərbaycanlıları Xocalı faciəsini yad edir, dünyanın diqqətinə çatdırır. Bu o deməkdir ki, sıravi kanadalı, orta statistik belçikalı və yaxud siyasi proseslərdən xəbərsiz, ölkəmizi yaxşı tanımayan hər hansı polyak, norveçli Xocalı soyqırımından məlumatlıdır.

Diaspor işi ilə paralel təbliğat aparılması daha güclü kampaniya təşkil edilməsinə rəvac verir. Bu işdə mühacirlərin, xaricdə təhsil alan tələbələrin rolunu xüsusi qeyd etmək olar. Eyni zamanda son illər Türkiyə telekanalları bu hadisələrlə bağlı çıxışlara geniş efir vaxtı ayırır, azərbaycanlı deputatlar, diaspor nümayəndələri verilişlərə dəvət olunur.

Hazırda Türkiyədə olan deputat, VHP sədri Sabir Rüstəmxanlı “Yeni Müsavat”a bildirib ki, bu tədbirlərin çeşidli və geniş keçirilməsi olduqca əhəmiyyətlidir. Onun sözlərinə görə, diaspor ilə birgə tələbələrin, xaricdə yaşayan soydaşlarımızın çalışması nəticəsində Amerikanın bir neçə ştatı Xocalı soyqırımını tanıyıb.

S.Rüstəmxanlının fikrincə, ermənilər qondarma soyqırımı şousuna hazırlaşır və onların məqsədi Qarabağı unutdurmaqdır:

“Bu soyqırımı şousuna hazırlığa görə tədbirlərimiz və təbliğat işimiz daha geniş həyata keçirilməlidir. Artıq müxtəlif yürüşlər keçirilir, sərgilər açılır, filmlər göstərilir, Xocalı həqiqətləri dünyanın diqqətinə çatdırılır.

Artıq 10 gündür ki, Türkiyədəyəm və qardaş ölkənin demək olar bütün universitetlərdə Xocalı soyqırımı coşqu ilə qeyd olunur, telekanallarda verilişlər hazırlanır. Ermənilərin qondarma soyqırımı şousuna hazırlığı ərəfəsində bu tədbirlərin keçirilməsi çox önəmlidir”.

Deputat qeyd edib ki, ermənilərə qarşı soyqırımı olmayıb, əksinə türklər və Azərbaycan türkləri qətliamla üzləşib:

“Xocalı sonuncu belə soyqırımı idi. Bütün vasitələrdən istifadə etməliyik ki, bu erməni vəhşiliyini dünyaya çatdıraq, kitablar yazırıq, başımıza gətirilən faciələrdən dünyanın məlumatlandırırıq. Türkiyə ilə birlikdə bu həqiqətləri dünyanın diqqətinə çatdırmaq xüsusilə əhəmiyyətlidir”.