Əmlak Məsələləri Dövlət Komitəsi hərraca çıxarılacaq dövlət xeyrinə müsadirə edilmiş əmlakın adını açıqlayıb.

Azerinfo.az Axar.az-a istinadən xəbər verir ki, hərraca çıxarılacaq müsadirə edilmiş əmlak arasında üstünlüyü müxtəlif markalı mobil telefonlar təşkil edir.

Mobil telefonlardan başqa, hərracda "Etrex Garmin" markalı GPS naviqatoru, "Amur" tipli alüminium qayıq, sayrışan işıq və çoxavazlı səs siqnalları, "Səpənd" tipli "Honda CD 125" modelli motosiklet, "Mariner-75" markalı asma qayıq mühərrik və rəst at da var. Hərracda ən bahalı məhsul "Mariner-75" markalı asma qayıq mühərrikidir ki, bunun da start qiyməti 600 manatdan başlayır. Hərraca çıxarılacaq rəst atın ilkin start qiyməti isə 150 manatdan başlayır.

Qeyd edək ki, hərrac 17 fevral tarixində saat 10.30-da Əmlak Məsələləri Dövlət Komitəsi yanında Hərracların Təşkili üzrə Auksion Mərkəzində keçiriləcək.

Hərraclarda qanunvericiliyə müvafiq olaraq alıcı hesab edilən, sifarişi və digər zəruri sənədləri təqdim etmiş, satılan əmlakın ilkin satış qiymətinin 10% həcmində beh ödəmiş hüquqi və fiziki şəxslər iştirak edə bilərlər. Məlumat dərc olunduğu gündən hərracda iştirak etmək istəyən fiziki və hüquqi şəxslər satışa çıxarılan əmlakla tanış olmaq və sifariş vermək üçün Əmlak Məsələləri Dövlət Komitəsi yanında Hərracların Təşkili üzrə Auksion Mərkəzinə müraciət edə bilər.