Əksər sahələrdə olduğu kimi təhsil sahəsində də eybəcərliklərin, anarxiyanın, rüşvətin, korrupsiyanın, süründürməçiliyin, müəyyən qalmaqalların və.s açıq şəkildə tüğyan etməsinin gündəlik şahidi oluruq. Ekspetlər bildirirlər ki, jurnalistlər yazırlar, hər kəs narahatçılığını bildirir, amma vəziyyət düzəlmir ki, düzəlmir. Yəni, zaman keçsə də yaxşılığa doğru heçnə dəyişmir

Müstəqilliyimizdən 24 il də ötdü. Bəzi vəzifə sahiblərinin danışıqları ilə bərabər, taladıqları da hər kəsə gün kimi aydın olmaqdadır. Elə bu səbəbdən də , onlara baxıb əksər rayonların təhsil ocaqlarının rəhbərliyində duran şəxslər də, başladılar həddi-hüdudu bilinməyən qanunsuzluq əməllərinə qol qoymağa. Bircə qalmışdı ki şagirdlərə dövlətin verdiyi təqaüdün mənimsənilməsinə, ona da toxundular. Yəni, “Hərbi Vətənpərvərlik və Mütəxəssis Hazırlığı Mərkəzi” MMC-nin Ağstafa rayon filialında olduğu kimi. Məktəbdə müəllimlərin məvaciblərinin düzgün hesablanmamasından, saysız-hesabsız qanunsuzluq əməllərinə qol qoyulmasından, müəyyən prosedur qaydalarının kobud şəkildə pozulmasından və digər xoşagəlməz olaylardan xəbərdar olduğumuz üçün, istəyimiz o oldu ki, rəhbərliklə birlikdə problemlərə aydınlıq gətirək.
Belə bir olaylar haqda məlumatları radaksiyamıza çatdıran mənbə bildirir ki, “Hərbi Vətənpərvərlik və Mütəxəssis Hazırlığı Mərkəzi” MMC-nin Ağstafa rayon filialının direktoru cənab Nizami müəllim, ona verilmiş ixtiyardan hər an yararlanaraq, bu gün də minbir hoqqalara qol qoymaqda davam edir. Yəni, məktəbdə sürücülük ixtisasına yiyələnmək istəyən şagirdlərin tam əksəriyyəti məktəb üzü tanımırlar, rəhbərlik tərəfindən “ilan qabığı” kimi də sanki “soyulur”lar. Məktəbdə kimsə müəllimlərin də axtarışına çıxarsa, dərs saatlarında adicə bir müəllimin tapılması da olduqca müşkül məsələyə çevrilir. Elə bu səbəbdəndir ki, adı məktəbdə olub özü dərs üzü görməyən şagirdlərlə bərabər, rəhbərliyə qarşı valideyin giley-güzarı da gündəlik artmaqda davam edir.
Redaksiyamızı məlumatlandıran mənbə onu da qeyd edir ki, məktəb kollektivinin və texniki işçilərin mütləq əksəriyyətinin mənimsənilən vəsaitləri hesabına, rəhbərlik və onun əsabələri bu günədək əməlli-başlıca var-dövlət qazanmağa da müvəffəq olublar. Düzdür, bu nə asan, nə də qorxusuz qazanılan var-dövlətdir. Hər halda cinayət tərkibi məsələlərdir deyə, mənbəmiz bildirir. Tam təfsilatı ilə yanaşdığımız bu kimi olaylar ən azından ikitərəfli araşdırma tələb etdiyindən, qarşı tərəfin də mövqeyini öyrənməkdə israrlı olduq. Elə bu məqsədlə məktəbin direktoru Nizami müəllimlə görüşüb müəyyən məsələlərə aydınlıq gətirmək istəsək də, təəssüflər olsun ki, istəyimiz elə istək olaraq qaldı. Çünki, onu da dərs saatlarında məktəbdə tapa bilmədik.
Hörmətli oxucular! Növbəti açıqlamamızda “Hərbi Vətənpərvərlik və Mütəxəssis Hazırlığı Mərkəzi” MMC-nin Ağstafa rayon filialında yaşanan durumun əksəriyyətə bəlli olmayan məqamlarından, rəhbərliyin son 3-4 ayda qol qoyduğu qanunsuzluq əməllərindən və.s bəhs edəcəyik.
Odur ki, bizi izləmyi unutmayın!
Məlik