Azərinfo: Elxan Əhmədov (Redaktor)
Tərəflər təmas xəttində və Ermənistan-Azərbaycan sərhədində ölümlə müşayiət olunan hücumlara görə bir-birlərini ittiham edir.

BBC - yə istinaden Şənbə günü Azərbaycanın Müdafiə Nazirliyi Ermənistan mətbuatında minik avtomobilin vurulması barədə məlumatların yalan olduğunu bəyan edib.
“Ermənistanın Müdafiə Nazirliyinə istinadən düşmən tərəfinin kütləvi informasiya vasitələrinin guya yanvarın 31-də Silahlı Qüvvələrimizin mövqelərinin və minik avtomobilinin məhv edilməsi barədə verilən məlumatlar yalandır və dezinformasiya xarakteri daşıyır”, - Müdafiə Nazirliyinin rəsmi məlumatında deyilir.
Nazirlik saytındakı eyni məlumatda “qabaqlayıcı tədbirlər nəticəsində təxribat törətmək məqsədilə minalanmış sahədən keçid açmağa cəhd göstərən düşmənin 6 nəfərdən ibarət hərbi qulluqçusu tam məhv” edildiyini bildirir.
Eyni zaman Müdafiə Nazirliyi bir əsgərin həlak olduğu qeyd edir.
Ermənistan Müdafiə Nazirliyinin mətbuat katibi Artsrun Hovhannisyan yanvarın 31-nə keçən gecə “təxribatlar üçün bütün məsuliyyət”in Azərbaycanın üzərinə düşdüyünü bildirib.
“Ötən gecə düşmən yenidən provokasiyalara əl atıb, xüsusilə Qarabağ istiqamətində. Diversiya hərəkətləri neytrallaşdırılıb, qabaqlayıcı tədbirlər görülmüşdür. Baş verənlər üçün bütün məsuliyyət Azərbaycanın hərbi-siyasi rəhbərliyi üzərinə düşür”, - Hovhannisyan öz Facebook səhifəsində yazıb.
Daha əvvəl Qarabağdakı erməni hərbi mənbələrinə istinadən, Ermənistan informasiya vasitələri “təhlükəsizlik təmin etmək məqsədilə şənbə günü saat 13 və 14 arasında DQR müdafiə ordusunun hərbçiləri tərəfindən cəzalandırma əməliyyatı” keçirildiyi barədə məlumat yayıblar.
2015-ci il başlayandan bəri tərəflər bir-birini Qarabağ təmas xəttində və Ermənistan-Azərbaycan sərhədində diversiyalar təşkil etməkdə, qarşı tərəfin hərbi mövqeləri və mülki məntəqələri müxtəlif çaplı silah növlərindən atəşə tutmaqda günahlandırırlar.
Bu məlumatları müstəqil mənbədən yoxlamaq mümkün olmayıb.