Bu yol Binəqədi rayonunun kənd ərazilərini əhatə edən hissəsi deyil; bu yol heç paytaxtdan bir addım uzaqda da yerləşmir.

Azerinfo.az Axar.az- a istinadən Gördüyünüz bu mənzərə Bakının 7-ci mikrorayon ərazisindəki Süleyman Sani Axundov küçəsidir. Hər gün burdan yüzlərlə marşrut avtobusunun şəhərin mərkəzinə işlədiyini, özü ilə bərabər hansı zibilləri haralara daşıdığını, hər gün burdakı ofislərə işləməyə gələn 200-dən artıq jurnalisti (“Teleqraf” MMC-nin yerləşdiyi ərazidə) təsəvvür edin.

İki ilə yaxındır ki, bu qədər acınacaqlı vəziyyətdə olan küçəyə Binəqədi rayon İcra Hakimiyyəti əl gəzdirmək istəmir. Bu küçənin başında yenicə inşa edilən toyxananın (şadlıq sarayının) ətrafı dərhal abadlaşdırıldı, küçənin ordan keçən hissəsi də təxminən 100 metrlik hissədə ən müasir standartlara uyğunlaşdırıldı və bunları Bakı meriyasına aid ustalar, fəhlələr və avtomobillər etdi. Amma o yüz metr təmir daha 200 metr uzanmadı – çünki toyxananın deyil, daha sonra sakinlərin, ziyalıların və redaksiyaların həyəti gəlirdi…

Binəqədi icra başçısına müraciət etmək istərdik: Siz özünüz Bakının yaraşıqlı simasına 7-ci mikrorayondakı bu bərbad küçəni necə yaraşdırırsınız? Cəmi 200 metrlik bir ərazini təmir edib qürurunu yaşamaq 2 ildir bu küçənin bu vəziyyətdə qalması biabırçılığından daha aşağı ictimai-psixoloji mənzərəmi sayılır? Yoxsa başladığınız nəcib “Təmiz Binəqədi” layihəsinin ayrılmaz tərkib hissəsi və layihənin simasımı sayırsınız S.S.Axundov küçəsini?