Elxan Əhmədov Azerinfo.az

17 erməni əsgərini məhv edən Azərbaycan Ordusu 3 canlı itki verib, yaralananlar var
Bakı, 26 yanvar, SalamNews. Son günlər işğal olunmuş Dağlıq Qarabağ ərazisində çoxsaylı itkilər verən Ermənistan Silahlı Qüvvələrinin bölmələri cəbhədəki ağır uğursuzluqlar səbəbilə növbəti dəfə daha aqressiv və eybəcər təxribata əl atıb.

Müdafiə Nazirliyinin Mətbuat xidmətinin məlumatına görə, düşmənin kəşfiyyat-təxribat qruplarının cəbhə boyu və Azərbaycan-Ermənistan dövlət sərhədində qoşunların təmas xəttində Azərbaycan Silahlı Qüvvələrinin (SQ) bölmələrinin mövqelərinə qəfil hücum etmək cəhdlərinin qarşısı uğurla alınıb.

Sayca qat-qat çox olan düşmənlə qeyri-bərabər döyüşdə Azərbaycan SQ-nin bölmələri şücaət və igidlik göstərib. Düşmən hücumlarının qarşısını alarkən 3 azərbaycanlı hərbçi şəhid olub, yaralananlar var.

Müdafiə naziri general-polkovnik Zakir Həsənovun əmrinə əsasən, şəhid hərbi qulluqçular ölümündən sonra "Hərbi xidmətdə fərqlənməyə görə" 3-cü dərəcəli medalla təltif ediliblər.

"Biz xalqımızdan həqiqəti gizlətmirik. Ermənistan mətbuatının, guya, cəbhədə çoxsaylı itkilərimizin olduğu barədə yaydığı məlumatlar tam yalandır, dezinformasiya xarakteri daşıyır və qoşunların təmas xəttindəki vəziyyəti düzgün əks etdirmir.", - Müdafiə Nazirliyinin bəyanatında deyilir.

Bildirək ki, bu ilin yanvar ayı ərzində gedən döyüşlərdə Ermənistan ordusunun 17 hərbi qulluqçusu məhv edilib, düşmənin 20-dək yaralısı var.