Azərinfo.TV : Elxan Əhmədov (Redaktor)

Əmək və Əhalinin Sosial Müdafiəsi Nazirliyi (ƏƏSMN) tərəfindən bölgələrdəəhaliyə tibbi-sosial ekspertiza xidmətinin maddi-texniki bazasının yaxşılaşdırılması və əlilik müayinələrinin müasir tələblərə uyğun şəraitdə aparılmasının təmin olunması istiqamətində işlər davam etdirilir. azirlik dekabrın 17-də Göyçay, Ağsu və Kürdəmir rayonları üzrə 20 saylı, Yevlax rayonu və Mingəçevir şəhəri üzrə 23 saylı, Şəki rayonu üzrə 17 saylı Tibbi-Sosial Ekspert Komissiyalarını (TSEK) müasir tələblərə uyğun iş şəraiti ilə təmin edib. Bu məqsədlə keçirilən tədbirlərdə əmək və əhalinin sosial müdafiəsi nazirinin müavini Natiq Məmmədov hazırda nazirliyin 38 regional TSEK-inin fəaliyyət göstərdiyini və nazirliyin digər yerli struktur bölmələri kimi, onların da iş şəraitinin müasir tələblərə uyğun qurulması sahəsində son aylarda müvafiq işlərin aparıldığını qeyd edib. O bildirib ki, bu günkü TSEK-lər də daxil olmaqla artıq 10 bölgə üzrə TSEK müasir iş şəraiti ilə təmin edilib və TSEK-lərin hamısında belə şəraitin yaradılması, həmçinin onların müasir müayinə cihazları ilə təchiz olunması üçün işlər davam etdirilir. Əsas məqsəd odur ki, vətəndaşlar bu komissiyalara müraciət edərkən normal iş şəraitində qəbul olunsunlar və keyfiyyətli xidmətlə təmin edilsinlər. TSEK-lər və ƏƏSMN-nin eyni region üzrə digər yerli qurumların bir binalarda yerləşdirilməsi vətəndaşlara sosial müdafiə, məşğulluğun və əmək hüquqlarının təminatı, tibbi-sosial ekspertiza üzrə əlaqəli iş şəraitində eyni məkandan xidmətlər göstərilməsinə imkan yaradır.
Qeyd olunub ki, son vaxtlarda tibbi-sosial ekspertiza sahəsində şəffaflığın təmin olunması və bu sahəyə nəzarətin gücləndirilməsi məqsədilə görülən işlər bu ilin ötən dövründə əlilliyi olan şəxslər arasında tam və hissəvi reabilitasiya göstəricilərinin yüksəlməsinə səbəb olub. Habelə bu sahə ilə bağlı şikayət xarakterli müraciətlərin sayı kəskin şəkildə azalaraq minimuma enib. Hazırda əlillik təyinatının avtomatlaşdırılması işləri də uğurla aparılır. Yeni yaradılan Tibbi-Sosial Ekspertiza və Əlillərin Reabilitasiyası İnformasiya Sistemi, həmçinin əlillik müayinələrinin nəticələri ilə bağlı elektron məlumat bazası əlillik təyinatı barədə aidiyyəti qurumlar arasında elektron məlumat mübadiləsinə, eləcə də vətəndaşların öz əlilik müayinələrinin nəticələrinə dair elektron arayışlar əldə edə bilmələrinə yönəlib.
Tədbirlər zamanı TSEK-lər üçün yaradılmış yeni iş şəraitləri, müayinə avadanlıqları nəzərdən keçirilib, vətəndaşlara göstərilən tibbi-sosial ekspertiza xidmətinə baxış olub. Yevlax şəhəri Heydər Əliyev prospektində yerləşən Əmək və Əhalinin Sosial Müdafiəsi Mərkəzinin birinci mərtəbəsində 23 saylı Tibbi-Sosial Ekspert Komissiyası üçün yeni iş otaqları hazırlanıb istifadəyə verilmişdir. Yevlax və Mingəçevir şəhər sakinlərinə xidmət edəcək TSEK-in açılışında iştirak etmək üçün gəlmiş respublika Əmək və Əhalinin Sosial Müdafiəsi Nazirliyinin rəsmiləri-nazir müavinləri Natiq Məmmədovu, Natiq Əzizovu Nazirliyin sosial siyasət şöbəsinin müdiri Saday Abdullayevi Yevlax Şəhər İcra Hakimiyyəti Başçısının birinci müavini Qənimət Qaraşov, Mərkəzi Şəhər Xəstəxanasının baş həkimi İlhami Quliyev, Şəhər Poliklinkasının müdiri Məhərrəm Gülməmmədov, digər rəsmilər və ictimaiyyət nümayəndələri qarşılamışlar.
Burada yenidən qurularaq tibb avadanlıqları, kompüter, digər elektron idarəetmə vasitələri ilə təchiz olunmuş gözləmə, müayinə, anketdoldurma, kompüter və arxiv sənədləri üçün nəzərdə tutulmuş otaqlarla tanışlıq zamanı nazir müavini Natiq Məmmədov görülən işlərin keyfiyyət və kəmiyyətindən razı qaldığını bildirdi. Onu da vurğuladı ki, artıq respublikamızın 10 bölgəsində TSEK-lər müasir iş şəraiti ilə təmin edilib. O cümlədən Yevlax və Mingəçevir əhalisi də bu yüksək səviyyəli bir pəncərəli xidmətdən razı qalacaqlar. Nazir müavini həmçinin başda 23 saylı TSEK-in sədri Yaşar Allahverdiyev olmaqla kollektivə əhaliyə xidmətin yüksək səviyyədə və şəffaflıq prinsipi əsasında təşkil olunması, həmçinin əlilliyi olan şəxslərin reablitasiya işinin daha da gücləndirilməsi kimi məsul vəzifələrində uğurlar arzulamaqla yanaşı bir sıra tapşırıq və tövsiyələrini də verdi.
Qonaqlar eyni zamanda müasir şəhərsalma stilini özündə ehtiva edən Yevlaxda son illər aparılan abadlıq, quruculuq işlərini bəyəndiklərini də vurğuladılar.