Tovuz rayon TSEK-na rəhbərlik edən Arif həkim “arif” addımlar atır desək, yəqin ki, yanılmarıq

Çünki, ötən illərdə həmin komissiyada sıravi həkim olan və baş verən dəyişikliklər nəticəsində müəyyən “daydayı”larının dəstəyi ilə komissiya sədrliyinə sahib olan Arif həkim, bu gün qol qoyduğu əməlləri ilə adını əməlli-başlıca dillər əzbəri edib. Düzdür, komissiya sədrliyinə təyinat aldığı ilk vaxtlarda o, özünü hər kəsə qanun-qaydaya əməl edən, heç bir qanunsuzluq əməllərinə qol qoymayan vəzifə sahibi kimi təqdim edirdi. Amma, dövr dəyişib zaman yeniləşdikcə, cənab Arif həkim də dəyişməyə başladı. Bəlkə də kimlərsə məqaləni oxuyub çaşbaş qalar ki, bu dəyişmək necədir, bəlkə bizlər də dəyişək! Yox əzizlərim, siz dəyişə bilməzsiniz! Çünki, o şəxs dəyişə bilər ki, qısa zaman kəsiyində kasıbçılığın daşını ata bilsin, Arif həkim kimi sağlam şəxsi xəstə edə bilsin, hətta bu azmış kimi, Tovuz rayon avtovağzalında özünün “mini nümayəndəliyini” aça bilsin. Və həmin “nümayəndəlikdə” də səlahiyyət sahibi Akif adlı şəxsə həvalə olunsun.
Bir faktı da qeyd edək ki, Arif həkim hansısa addımını atanda yüz ölçüb bir də biçir. Məsələn, Tovuz rayon sakinlərinin bildirdiklərinə görə, o, sağlam şəxsin istəyini gerçəkləşdirərkən, həmin şəxsi qəbul otağında deyil, rayonun Ağdam kəndinə gedən yolun üstündəki kafedə qəbul edir və oradan da yola salır. Belə bir “qəbul”un da xüsusi özəlliyi, necə deyərlər “arif” qaydaları var. Bax bu qaydaların da yalnız bir müəllifi var, o da Tovuz TSEK-nin sədri cənab Arif həkimdir.
Hörmətli oxucular! Yaxın günlərdə sizləri daha müfəssəl məlumatlarla məlumatlandırmağa çalışacağıq. O halda bilib başa düşəcəksiniz ki, hörmətli Səlim Müslümovun etibar edib təyin etdiyi Arif həkim, bu gün nə kimi “arif” addımlar atır. Odur ki, bizi izləməyi unutmayın.

Məlik