Ölkədə çağırış yaşı çatan və həqiqi hərbi xidmətdən möhlət hüququ olmayan gənclərin ordu sıralarına yola salınmasına başlanılıb. Bu münasibətlə Göygöl və Samuxda təntənəli mərasim təşkil olunub.

Göygöldə çağırışçı gənclər əvvəlcə ümummilli lider Heydər Əliyevin abidəsini ziyarət edib. Daha sonra çağırışçılar Heydər Əliyev mərkəzində dahi şəxsiyyətin həyat və fəaliyyətini əks etdirən fotostendlərə baxış keçirib. Səfərbərlik və Hərbi Xidmətə Çağırış Üzrə Dövlət Xidmətinin Göygöl rayon şöbəsində həkim nəzarətindən keçən çağırışçılar sağlamlıqları haqqında müsbət rəy aldıqdan sonra təntənəli mərasimə qatılıblar. Qeyd olunub ki, ordumuzun əsgərləri düşmənin hər həmləsinə cəldliklə cavab verməyə və işğal altındakı torpaqlarımızı azad etməyə qadirdir. Çağırışçı gənclər və onların valideynləri hər an əldə silah Ali Baş Komandanın döyüş əmrinə hazır olduqlarını dilə gətiriblər. Rəsmi hissədən sonra gənclər müqəddəs "Qurani Kərim"in altından keçməklə dövlət bayrağımızı öpüblər. Çağırışçılar milli musiqinin sədaları altında xüsusi avtobuslarla bölgü üzrə hərbi hissələrə yola salınıb.

Emin İbrahimov- çağırışçı: "Mən çox sevinirəm ki, Azərbaycan ordusunda xidmət etməyə gedirəm. Sevincimin həddi hüdudu yoxdur. Bütün uşaqlara uğurlar arzulayıram".

Bəhlul Quliyev- valideyn: "Çox sevinirəm ki, oğlum əsgər gedir. Allah hamısını qorusun. Bütün əsgərlərə uğurlar arzulayıram".

Samuxda da çağırış yaşı çatan gənclər ordu sıralarına yollanmazdan öncə ulu öndər Heydər Əliyevin abidəsini ziyarət edib. Dahi şəxsiyyətin adını daşıyan mərkəzdə ümummilli liderin müxtəlif illərdə çəkdirdiyi rəsmlərlə tanış olublar. Tədbirdə çıxış edənlər gələcəyin əsgərlərinə xidmətdə ayıq- sayıq olmağı və düşmənə layiqli müqavimət göstərməyi tövsiyə ediblər. Çıxışlarda çağırışçılar göstərilən etimadı doğruldacaqlarına və düşmən tapdağı altında torpaqlarımızı tezliklə azad edəcəklərinə əminlik ifadə olunub.

Elmir İsgəndərov- çağırışçı: "Öz hərbi vəzifəmi yerinə yetirməyə gedirəm. Mən çalışacam ki, öz xidmət dövrümdə qardaşım Azərbaycanın Milli Qəhrəmanı Eltun İsgəndərovun adına layiq xidmət keçim".

Rəsmi hissədən sonra gənc çağırışçılar müqəddəs "Qurani Kərim"in altından keçməklə dövlət bayrağımızı öpüblər. Yola salma şən musiqilərin ahəngi ilə davam edib.

http://kepeztv.az