Ölkə ərazisində elə gün yoxdur ki, yol qəzaları baş verməsin və bu qəzalar insan ölümü, xəsarətlə nəticələnməsin. Nə qədər üzücü olsa da, qaydalar pozulur, bu isə əksər hallarda ağır sonuclara gətirib çıxarır.

Paytaxtda yüksək sürət fayda verməyən peşmançılığa səbəb olub. Binəqədi rayonu Ziya Bünyadov prospektində hərəkətdə olan “Renault”un sürücüsü Əhməd Rəcəbli küçəsinə dönmək istəyərkən idarəetməni itirib. Yol ayrıcındakı maneəni aşıb keçən avtomobil “Mercedes” markalı nəqliyyat vasitəsinə də çırpılıb. Avtomobillərdə olan 27 yaşlı Orxan Hüseynov, onun həmyaşıdı Əhliman Ələsgərov, 16 yaşlı Eltac Məmişov və atası 45 yaşlı Elçin xəsarət alıb. Yaralılar təcili tibbi yardım avtomobili ilə xəstəxanaya çatdırılıblar. Əhliman və Eltacın vəziyyəti ağırdır.

Şamaxıda baş verən yol qəzası da dörd nəfəri xəstəxanalıq edib. Hadisə şahidlərinin sözlərinə görə, Bakı-Şamaxı-Yevlax yolunun 124 km-də heç bir xəbərdaredici nişan qoyulmadan qazılan quyuya düşən “Mercedes”in sürücüsü idarəetməni itirib. Nəticədə maşın əks istiqamətdə hərəkətdə olan eyni markalı avtomobilə çırpılıb. Nəticədə Göycay sakini 51 yaşlı Xalidə Məmmədova, Şamaxı sakinləri 54 yaşlı Novruz Quliyev, 44 yaşlı Mirvari Zərbalıyeva, 54 yaşlı Qızxanım Qurbanova müxtəlif dərəcəli bədən xəsarətləri alıblar. Yaralılar Şamaxı Mərkəzi Rayon Xəstəxanasına yerləşdiriblər, vəziyyətləri orta-ağır qiymətləndirilir.

Şəkidə isə Bakı sakini Nüsrət Allahverdiyevin idarə etdiyi “Volkswagen Passat”la Azər Həşimovun idarə etdiyi “Hyundai Accent” toqquşub. Nəticədə “Hyundai”nin sükanı arxasında oturan Şəkinin Baltalı kənd sakini Azər Həşimov xəsarət alıb. O, dərhal Rayon Mərkəzi Xəstəxanasına çatdırılıb.

Bütün faktlarla bağlı araşdırma aparılır.

kepeztv.az