”Seçki-2015″ rubrikamızın bu dəfə haqqında danışacağı şəxs -AMEA-nın müxbir üzvü, Milli Məclisin deputatı,psixologiya və sosial fəlsəfə sahəsində tanınmış mütəxəssis, professor Bəxtiyar Əliyevdir

B.Əliyev 1961-ci il martın 20-də Ağdamın Papravənd kəndində anadan olub. M.V.Lomonosov adına Moskva Dövlət Universitetinin psixologiya fakültəsini bitirib (1983). Psixologiya elmləri doktoru, Azərbaycan Milli Elmlər Akademiyasının müxbir üzvüdür. 15 monoqrafiya və kitabın, 150 elmi məqalənin müəllifidir. Rus və ingilis dillərini bilir.

1983-1997-ci illərdə Azərbaycan Dövlət Universitetində baş laborant, müəllim, baş müəllim, dekan müavini, dosent vəzifələrində çalışıb. 1997-ci ildən Bakı Dövlət Universitetinin psixologiya kafedrasının müdiridir. 2000, 2005 və 2010-cu illərdə Milli Məclisin deputatı seçilib. Parlamentin elm və təhsil komitəsi sədrinin müavinidir. Evlidir, 2 övladı var.

Təhsilə bağlı insan

Bəxtiyar müəllim elmə-təhsilə bağlı adamdır. MM-də təhsillə bağlı onun qədər təklif verən millət vəkili çox azdır. Bu çıxışlardan biri-Milli Məclisin elm və təhsil komitəsinin sədr müavini, professor Bəxtiyar Əliyev təhsil sahəsi ilə bağlı bir sıra təkliflərlə çıxış edib. B.Əliyev deyib ki, Azərbaycanda yeni nəsil universitetlər yaradılmalıdır, elmlə təhsilin vəhdəti təmin edilməlir və onların tədqiqatçı–innovasiya mərkəzlərinə çevrilməsinə dəstək verən, rəqabət qabiliyyətli mütəxəssis hazırlığını təmin edən mexanizmlər hazırlanmalıdır: “Ali təhsil müəssisələrinə təhsilin məzmununun tətbiqi, idarəetmə, akademik, maliyyə və təşkilati müstəqillik verilməlidir. Eyni zamanda, mülkiyyət formasından asılı olmayaraq bütün təhsil müəssisələrinə ödənişli təhsil üzrə qəbul planı ləğv edilməli və dövlət sifarişi istisna olmaqla, tələbələrin qəbulu və yerləşdiriliməsi mexanizmlərinə yenidən baxılmalıdır. Müəllimin nüfuzunu artırmaq, sosial müdafiəsini təmin etmək üçün ona dövlət qulluqçusuna bərabər status müəyyənləşdirilməlidir”. Məğər bu təklifləri bütün müəllimlər həsrətlə gözləmirmi?

Məcburi köçkünlərlə bağlı çıxışarı

Bəxtiyar Əliyev təkcə sağdamlılarla bağlı deyil ,ümumiyyətlə məcburu köçkünlərin vəziyyəti ilə daim maraqlanıb, bəzən kəskin çıxışlar edib.

Deputat son zamanlar məcburi köçkünlərin kütləvi məhkəmələrə cəlb olunması prosesinin getdiyini vurğulayaraq narahatlığını belə ifadə edib:

“19-20 il məskunlaşdıqları yerdən məcburi köçkünləri çıxarmaq istəyən qüvvələr var. Mən hesab edirəm ki, hansısa qüvvələr narazılıq yaratmaq istəyirlər, görülən işlərə kölgə salmaq istəyirlər”. B.Əliyev deyib ki, Prezidentin sərənçamları, fərmanları var ki, məcburi köçkünlər məskunlaşdıqları yerdən çıxarıla bilməzlər. O qeyd edib ki, bu məsələlərə mütləq diqqət yetirmək lazımdır.”

İş yerləri ilə bağlı

Seçildiyi ərazidə əhalinin işlə təmin olunma məsələsi də daim deputatı narahat edib.Çıxışlarında B.Əliyev deyir ki, Azərbaycanda regionların sosial-iqtisadi inkişafı ilə bağlı kifayət qədər işlər görülüb. Millət vəkilinin sözlərinə görə, vaxtilə Milli Məclisdə sərhədyanı bölgələrlə bağlı qanunun qəbulu məsələsi gündəmə gəlmişdi. “Regionların sosial-iqtisadi inkişafı ilə bağlı görülən işlərin birinçi mərhələsi başa çatıb. Əksər rayonlarda iş yerləri var. Ancaq regionların sosial-iqtisadi inkişafı ilə bağlı Dövlət Proqramının ikinçi mərhələsində bu məsələlər elə icra olunur ki, sərhədyanı bölgələrə geç gedib çatır. Ona görə də bu məsələlərə xüsusi diqqət etmək lazımdır”.

Özəl yazılarda istinad zəruridir.