Görəsən 20 fevral 2016-cı il tarixdə Ramiz adlı yol polisi əməkdaşı, Anar Ağammədovla bağlı ilk protokolu tərtib edərkən anlaqlı olmayıbmı ki, o, belə bir addımını atıb? Yoxsa, şikayətçinin söylədiyi kimi Cəlilabadın Yol Polisi şöbəsində, “Yol hərəkəti haqqında” qanınlarımızla “iqruşka” oynanılır açıqlaması həqiqətdir?

Yol polisi əməkdaşlarının zaman-zaman “Yol hərəkəti haqqında” qanunlarmıza məhəl qoymamaları, sürücülərlə kobud davranmaları və onların hansısa maraqlar çərçivəsində get-gələ salınmaları və.s barədə məlumatları eşitsək də, nədənsə bu cür qanunsuzluqlara rəvac verən yol polisi əməkdaşlarına qarşı, çox zaman ciddi addımlar atılmayıb. Onların tabe olduqları qurumlar isə, əksər hallarda belə bir qanunsuzluqlara qol qoyan yol polisi əməkdaşlarının müdafiəçisi rolunda çıxış ediblər.

Məsələn, hələ bir müddət bundan əvvəl, Masallı rayonu Ərkivan kənd sakini Ağammədov Anar Zakir oğlunun informasiya mərkəzimizə ünvanladığı şikayət ərizəsi daxil olmuşdu. O, yazdığı şikayət ərizəsində bildirirdi ki, Cəlilabadın yol polisi şöbəsində haqq-ədalət “qeybə çəkilib” və qanunlarımızla “iqruşka” kimi davranılır. Baş verən olayla bağlı Anar Ağammədov onu da vuğulayırdı ki, “20 fevral 2016-cı il tarixdə saat təqribən 11 radələrində idarə etdiyim “Kamaz” markalı, dövlət qeydiyyat nişanı 44 BF 979 nəqliyyat vasitəsilə, Cəlilabad rayon Polis Şöbəsinin qarşısından keçib rayonun mərkəzi ərazisinə yük (üzlük aqlay daşları) aparırdım. Həmin vaxt yol polisi şöbəsinin Ramiz adlı əməkdaşı məni saxlayıb bildirdi ki, “sən “Yol hərəkəti haqqında” qanunun tələblərini pozmusan, 50 manat pul ver ki, sənə protokol yazmayım” dedikdə, ona iradımı bildirdim və istədiyi rüşvəti də vermədim. Çünki, hərəkət etdiyim yoldan əlavə alternativ yol olmadığından, “yük avtomobillərinin girişi qadağandır” nişanəsini qoyulduğu yolla hərəkət etməyə məcbur oldum. Buna səbəb o oldu ki, yük avtomobillərinin girişi qadağan olunmayan yollarda, şəhərin kanalizasiya sisteminin yenidən qurulması ilə bağlı qazıntı işləri aparılırdırdı. Amma, yol polisi əməkdaşı aparılan qazıntı işləri ilə bağlı ümumi vəziyyəti nəzərə almadı və mənimlə olduqca qərəzli davranıb, “Yol hərəkəti haqqında” Azərbaycan Respublikası Qanununun 64-cü maddəsini tətbiq etməklə, yəni “yük avtomobillərinin girişi qadağandır və hərəkəti qadağandır” yol nişanələrinin tələblərinin pozulması barədə protokol tərtib edib, mənə 60 manat cərimə və 3 bal da yazdı. Belə bir yanaşmanın varlığı, olduqca ciddi qanun pozuntusu oldu. Çünki, hərəkətdə olduğum ərazidə yalnız “yük avtomobillərinin girişi qadağandır” nişanəsi qoyulsa da, yol polisi əməkdaşının kefi necə istədi, elə də hərəkət etdi. Belə bir qanun pozuntusuna yol verən sürücü əslində 40 manat cərimə olunmalı olduğu halda, o, “yük avtomobillərinin girişi qadağandır və hərəkəti qadağandır” yol nişanələrinin tələblərinin pozulması barədə protokol tərtib etməklə, mənə 60 manat cərimə və 3 bal da yazdı”.

Diqqəti o hal cəlb edir ki, Anar Ağammədovun informasiya mərkəzimizə ünvanladığı şikayət ərizəsi əsasında “Cəlilabadda yol polisi əməkdaşının rüşvət iddiası nə ilə nəticələndi?” başlıqlı tənqidi məqalə hazırlayıb, həmin məqaləni 06 mart 2016-cı il tarixdə Azərinfo.az saytında yerləşdirdik və baş verən problemin araşdırılması üçün, aidiyyəti qurumlara məktub da ünvanladıq. Çox keçmədi ki, informasiya mərkəzimizə belə bir məlumat da daxil oldu ki, məqalənin dərcindən sonra Cəlilabadın yol polisi şöbəsinin rəhbərliyi “uzaqgörənlik edərək”, Anar Ağammədovla bağlı 20 fevral 2016-cı il tarixdə tərtib olunmuş protokolu, 29 fevral 2016-cı il tarixdə dəyişdirirlər. Dəyişdirilmiş protokolda isə, Anar Ağammədova 40 manat cərimə yazılır və protokolu da “guya səhv olub” bəhanəsi ilə dəyişdirirlər.

Belə olan halda ortaya çoxsaylı suallar çıxır ki, görəsən 20 fevral 2016-cı il tarixdə Ramiz adlı yol polisi əməkdaşı, Anar Ağammədovla bağlı ilk protokolu tərtib edərkən anlaqlı olmayıbmı ki, o, belə bir addımını atıb? Yoxsa, şikayətçinin söylədiyi kimi Cəlilabadın Yol Polisi şöbəsində, “Yol hərəkəti haqqında” qanınlarımızla “iqruşka” oynanılır açıqlaması həqiqətdir?

Bütün bunlardan sonra belə bir qənaətə gəlmişik ki, Baş Dövlət Yol Polisi İdarəsinin rəisi, polis general-mayoru cənab Ramiz Zeynalov, yol polisi əməkdaşlarının işgüzar nüfuzuna ləkə gətirən, onların rüşvətxorluqda və qanunsuz əməllərə qol qoymalarında ittiham olunmalarına səbəbkar olan Ramiz adlı yol polisi əməkdaşının və onun əməllərinə qanuni don geyindirən Cəlilabad Yol Polisi Şöbəsinin rəhbərliyi ilə bağlı müvafiq qərarını verib, lazımi addımlarını da atacaq. Əgər onlarla bağlı lazımi addımlar atılmazsa, o halda kim təminat verə bilər ki, Cəlilabadın yol polisi şöbəsinin əməkdaşları növbəti qanunsuzluqlara imza atmayacaqlar?