12 mart Azərbaycanda Daxili Qoşunların yaranması günüdür. Bu güc strukturu dövlətimiz və dövlətçiliyimiz uğrunda, ictimai asayişin qorunması naminə həmişə inamla, şərəf və ləyaqətlə mübarizə aparmaqdadır. Qürur hissi ilə deyə bilərik ki, bu gün Daxili Qoşunlarımızın maddi-texniki bazası çox yüksək səviyyədədir.

Tarixə nəzər salsaq görərik ki, 1992-ci il martın 12-də Daxili Qoşunların Biləcəri, Sumqayıt, Gəncə hərbi hissələri erməni işğalçılarına qarşı döyüşə başlayıb, ərazi bütövlüyümüz uğrunda Ağdam rayonunun Papravənd, Qalayçılar, Manikli, Baş Güneypəyə, Canyataq, Gülyataq kəndlərində vuruşub. Azərbaycanın ərazi bütövlüyü uğrunda döyüşlərdə Daxili Qoşunların döyüşçüləri də qəhrəmanlıq göstərərək, şəhid veriblər. Döyüş əməliyyatları aparılan müddətdə qoşunların şəxsi heyətindən 496 nəfər həlak olub, 1166 nəfər yaralanıb, 268 nəfər isə itkin düşüb.
1995-ci il martın 9-da Ulu öndər Heydər Əliyevin imzaladığı müvafiq Fərmanla Azərbaycan Daxili Qoşunlarının ölkəmizin müstəqilliyi, ərazi bütövlüyü uğrunda erməni işğalçılarına qarşı döyüşə başladıqları gün - yəni 12 mart tarixi Daxili Qoşunlar günü elan olunub.
Daxili işlər orqanlarının ayrılmaz tərkib hissəsi olan Daxili Qoşunlar ötən illərdə şərəfli yol keçib, ciddi sınaq və çətinliklərdən dəyanətlə çıxaraq, daha da inkişaf edib. Hazırda, Daxili Qoşunların bir çox dövlətlər və beynəlxalq təşkilatlarla əməkdaşlıq əlaqələri mövcuddur. Bu gün Daxili Qoşunların qarşısında duran başlıca vəzifə ölkədə sabitliyin qorunmasına xidmət etmək, müxtəlif təxribatların qarşısını almaq, vətəndaşların əmin-amanlığını qorumaqdır.
Qoşunların gizir və müddətdən artıq xidmət edən hərbi qulluqçularla komplektləşdirilməsi əsasən həqiqi hərbi xidməti başa vurduqdan sonra xidmətini davam etdirməyə öhdəlik vermiş şəxslərin hesabına həyata keçirilir. Kiçik komandir və mütəxəssislərin hazırlanması 3 ay müddətində davam edir və kursları bitirdikdən sonra onlar xidməti yerləri üzrə hərbi hissələrə göndərilirlər.
Hazırda Daxili Qoşunların bir çox dövlətlər və beynəlxalq təşkilatlarla əməkdaşlıq əlaqələri vardır. Zabitlərimiz xarici ölkələrdə təhsil alırlar. Bu gün Daxili Qoşunların qarşısında duran başlıca vəzifə ölkədə sabitliyin qorunmasına xidmət etmək, müxtəlif təxribatların qarşısını almaq, vətəndaşların əmin-amanlığını qorumaqdır. Qarşıya qoyulmuş tapşırıqları uğurla yerinə yetirmək üçün ötən il bir sıra təşkilati-praktik tədbirlər keçirilmişdir.
Daxili Qoşunların şəxsi heyəti paytaxtda və bölgələrdə keçirilən müxtəlif tədbirlərdə fəal iştirak edirlər.
Bu gün Daxili Qoşunlarımızın şəxsi heyəti, ictimai asayişin qorunması ilə yanaşı, torpaqlarımızı düşmən tapdağından azad etmək üçün döyüşməyə daim hazırdır.