Azerinfo.az-ın əməkdaşı, vaxtilə elmi və siyasi həyatımızda böyük töhvələr vermiş, yüzlərlə tələbə və müəllim heyətinin sevgi və rəğbətini qazanmış, lakin hazırda yatağa məhkum olan Paşa Cəfərovun evində olub və onun haqqında məlumatı sizə təqdim edir.

Cəfərov Paşa Abbasqulu oğlu 1937 ci ildə Tovuz rayonunun Bozalqanlı kəndində anadan olub. Atası 1943-cü ildə Böyük Vətən müharibəsində həlak olmuş, anası isə 1976-cı ilədək kolxozda çalışıbdır. A. S. Puşkin adına orta məktəbi bitirdikdən sonra 1955-ci ildə Azərbaycan Kənd Təsərrüfatı İnstitutunun Zootexnika fakültəsinə daxil olub və 1960-ci ildə həmin institutu bitirərək alim-zootexnik ixtisasına yiyələnib. 1960-cı ilin may ayından, 1962-ci ilin sentyabr ayına kimi Azərbaycan Kənd Təsərrüfatı Nazirliyinin təyinatı ilə Tovuz rayonu Nizami adına kolxozda baş zootexnik vəzifəsində işləyib. 1962-ci ilin oktyabr ayında Azərbaycan Kənd Təsərrüfatı İnstitutunun “Qoyunçuluq” ixtisası üzrə “Xüsusi heyvandarlıq” kafedrasının əyani aspiranturasına daxil olub. 1964-cü ildə aspiranturada oxuduğu müddətdə partiya sıralarına qoşulub, 1965 - 70-ci illərdə Fakültə Partiya Təşkilatı Büro üzvü olub.
1965-ci ildə aspiranturanı müvəffəqiyyətlə bitirərək, 1966-cı ilin noyabr ayında namizədlik dissertasiyasını müdafiə edib. 1967-ci ildə Ali Attestasiya Komissiyası tərəfindən kənd təsərrüfatı elmləri namizədi, alimlik dərəcəsi adına layiq görülüb.
1965-ci ildən AKTA-da dərs deməklə, əvvəlcə assistent, 1969-cu ildən 90-cı illərə kimi dosent olmuş, 1979-80 və 1989-1994-cü illərdə zoomühəndislik fakültəsinin dekanı olub.
1987-1989 və 1998-2003cü illərdə “Heyvandarlıq və heyvandarlıq məhsullarının istehsalının texnologiyası” kafedrasında kafedra müdiri vəzifəsində işləyib. P. Cəfərov 45 ildən artıq AKTA-da işlədiyi müddətdə dəfələrlə respublika tədbirlərində iştirak etmişdir. Respublikanın, Gəncə şəhərinin, AKTA-nın ictimai işlərində yaxından iştirak etmiş və öz əməyini əsirgəməmişdir. O, gənclik dövründən bu günədək ictimai əsaslarla komsomol, partiya və həmkarlar təşkilatlarında rəhbər vəzifələrdə çalışmışdır.
P. Cəfərov 1971-73-cü illərdə AKTA-nın Həmkarlar İttifaqı Təşkilatına rəhbərlik etmişdir. İşlədiyi müddətdə Moskva, Leninqrad, Kiyev, Alma-Ata, Tbilisi, Stavropol və s. şəhərlərdə elmi konfrans və simpoziumlarda məruzələrlə çıxışlar etmişdir. 100-dən çox elmi əsərin, 5 dərs vəsaitinin, 2 elmi ixtiranın, onlarla proqram və metodiki göstərişin müəllifidir.
P. Cəfərov ölkənin siyasi həyatında da öz xidmətini əsirgəməyib. O, Azərbaycan Kommunist Partiyasının Gəncə şəhər təşkilatının rəhbərlərindən olub, partiya işində böyük xidmətlər göstərib, dəfələrlə Moskva şəhərində keçirilən konfranslarlarda iştirak edib.
P. Cəfərovun 2 oğlu 1990-93-cü illərdə Qarabağ döyüşlərində vuruşub, özü isə dəfələrlə Tərtərdə, Fizulidə və s. müxtəlif cəbhə bölgələrinə gedərək və öz hesabına yardımlar aparıb, orda döyüşən əsgərlərə çatdırırmış.
Çox təəssüflər olsun ki, belə layiqli insanımız demək olar ki, unudulmuşlar siyahısındadır. Hazırda Paşa müəllim Gəncə şəhərində yaşayır, ağır xəstədir, 5 ildən çoxdur ki, yatağa məhkumdur. Eyni zamanda P. Cəfərovun bir oğlu Qarabağ veteranı və əlilidir.
Üzücü haldır ki, bu ailədə iki dəyərli insan, bir alim və bir Qarabağ əlili yatağa məhkumdur. Bu insanları unutmayaq.

GÜNEL MƏMMƏDOVA