Son günlər xüsusi diqqət mərkəzində olan Naxçıvan MR Ali Məclisinin sədri Vasif Talıbovdan xəbər var. Bu barədə tanınmış jurnalist Heydər Oğuz paylaşım edib.

Jurnalist yazır: ""Xan" həzrətləri Naxçıvanda bu gün yenə kütləvi iməclik keçirməyə qərar verib. Mənə məktub yazan çoxsaylı naxçıvanlılar bu məsələni qaldırmağı, Muxtar Respublikada iməclik işgəncələrinə son qoyulmasını tələb edirlər. Hesab edirəm ki, haqlı tələbdir və "Vasif "xan" iməclikləri vətəndaşın istirahət hüququnun pozulması ilə yanaşı, Azərbaycan Respublikasının Əmək Məcələsinin 17-ci maddəsinin kobud şəkildə pozulmasıdır. Maddədə deyilir:
"Maddə 17. Məcburi əməyin qadağan edilməsi
1. Hər hansı qayda və üsulla zor işlətməklə, həmçinin əmək müqaviləsinə xitam veriləcəyi hədə-qorxusu ilə işçini əmək funksiyasına daxil olmayan işi (xidməti) yerinə yetirməyə məcbur etmək qadağandır. İşçini məcburi əməyə cəlb edən təqsirkar şəxslər qanunvericiliklə müəyyən edilmiş qaydada məsuliyyətə cəlb edilirlər.""

H.Oğuz eyni zamanda ölkə rəhbərliyinə xitab edərək, aşağıdakı çağırışda da bulunub: "Azərbaycan Baş Prokurorluğu Vasif Talıbov tərəfindən işğal olunmuş Naxçıvanda yaşayan Azərbaycan vətəndaşlarının hüquqlarını qorumalı, insanlarla əsir kimi davranan "xan" barəsində dərhal cinayət işi açmalıdır".

İddia olunanlarla bağlı dia.az olaraq bütün maraqlı tərəfləri dinləməyə hazırıq...