“Naxçıvan Muxtar Respublikası Təhsil Nazirliyi Aparatının rəhbəri Rəşad Əlizadə ötən il Culfa məktəblərinə payız mövsümü üçün verilən bir qazel pəncərə şüşəsini Culfa təhsil şöbəsinin müdiri ilə əlbir olub məktəbə yox satışa göndərdiyi yerdə DTX tərəfindən yaxalanmışdı”.

Ovqat.com-a bu barədə məlumat Naxçıvandakı etibarlı mənbələrdən daxil olub.

Mənbəmizin iddiasına görə, hər iki məmur Naxçıvan DTX-da yaxşıca “tərlədildikdən” sonra sərbəst buraxılmış və onlar yenə öz qanunsuz fəaliyyətlərini davam etdirirlər.

“Rəşad Əlizadənin əsas gəlir mənbəyi isə boş müəllim yerlərini hərraca çıxarmasıdır. Məktəblərdə vakansiya müəllim yeri olanda həmin yerlər qanunsuz şəkildə Rəşad Əlizadə və nazir Rəhman Məmmədov tərəfindən satılır. Bütün təhsil işçiləri bunu təsdiqləyə bilər. Belə ki, şəhər və şəhərətrafı vakant yer çıxarsa uzaqda yaşayan pul verən müəllimləri həmin yerlərə imtahansız “perevod” edirlər. Bu isə tam qanunsuzdur. Qanunlara əsasən, bu cür yerdəyişmələr də imtahanla olmalıdır. Hazırda Naxçıvan məktəblərində onlarla “perevod” edilənlər var və həmin müəllimlərdən külli miqdanrda rüşvət alınır. Yeni açılmış kimya biologiya liseyinin təşkilindən mənimsəniləmiş pullarla Rəşad müəllim 2 il ərzində artıq 3-cü evini alıb. Sonuncu aldığı ev sürücülük məktəbi tərəfdədir.

Gülməli olsa da, Təhsil Nazirliyinin öz nəznində fəaliyyət göstərən özəl təhsil kursu var. Həmin kursda hər ay sınaq imtahanı keçirilir. Məktəb rəhbərliyini məcbur edirlər ki, bütün şagirdlər ödənişli sınaqlarda iştirak etsinlər. Valideynlərdən bu yolla külli miqdarda məcbur pul yığılır”.

NDU-da təhsil ayrıcalığı

Həmsöhbətimiz Naxçıvan Dövlət Universitetindəki rüşvət mexanizmindən də bəhs edib. Onun sözlərinə görə Naxçıvan Dövlət Universitetində rüşvət aşağıdakı prinsip üzrə yığılır:

“Dekanlar hər tələbədən bir semestr üçün 1000-1500 manat rüşvət alırlar. Toplanan həmin vəsaitlər universitetin təhsil və tərbiyə işləri üzrə prorektoru Rəhimov Rafiqə ötürülür. Bütün pay bölgüsü Rafiq tərəfindən həyata keçirilir. Rektorun və digər rəhbər şəxslərin “payı” verildikdən sonra dekanların “haqqı” yenidən özlərinə qayıdır. Müəllimlər isə bu rüşvət yığımından heç nə ala bilmirlər. Hünərləri nədir, tələbəyə yaxınlaşıb ondan pul istəyə”, - mənbəmiz bildirilir.

Həmsöhbətmizin qeyd edir ki, hazırda NDU təhsil ocağından çox, tikinti “məbədi”nə çevrilib: “Universitetin ərazisində eyni vaxtda 4 tikinti aparılır. Bu, NDU-nun korpuslarının artırılmasına yox, ali təhsil ocağının maliyyə imkanlarının ora-bura ayrılaraq yeyilməsinə xidmət edir”. Bildirildiyinə görə, universitet büdcəsinin 40-50%-i tikintiyə sərf olunur.

Başdan-ayağa pul demək olan sahələr

“Universitetdə elektron qeydiyyat jurnalları var. Bu gün artıq kağızla qeydiyyat aparılmır. Elektron qeydiyyatın əlavə kodu dekanlıqlara verilib. Müəllim dərsə gəlməyən tələbələrə elektron qeydiyyata “qayıb” yazır. Üzərindən bir neçə dəqiqə keçməmiş dekanlıqda o “qayıb” pozulur, yerinə “iştirak edib” yazılır. Əlbəttə, tələbədən rüşvət aldıqdan sonra”, -deyən mənbəmiz vurğulayır ki, bütün bunlar əyani bölmələrində baş verənlərdir. Qiyabi təhsildən isə heç danışmağa dəyməz: “Qiyabi təhsil başdan-ayağa pul deməkdir”.

Mənbəmiz qeyd edib ki, NDU-də ən gəlirli sahələrdən biri də ikinci təhsil, magistr yetişdirmə və xarici tələbələrlə işdir: “Magistrlik sahəsində lüzumsuz əlavə hoqqalardan da çıxırlar. Məsələn, nəzərdə tutulmadığı halda magistrlərdən məcburi ingilis dili proqramı üzrə pullu təhsil və yaxud da əlavə ödəmələr tələb edən hazırlıqlar təşkil olunur. Aspirantların hazırlıqlara getməmək seçimi yoxdur”.

Güzəşt yoxdur

Mənbəmizin dediyinə görə, sosial-iqtisadi vəziyyətindən asılı olmayaraq, heç bir tələbəyə güzəşt edilmir: “İstisnalar da var, əlbəttə. Yalnız rektorun himayəsindəki tələbələrə, bir də yaxşı yaltaqlıq bacarığına malik olanlara güzəşt edilə bilər”.

Qaynağımız bildirib ki, universitetin rektoru sözügedən ali təhsil ocağını akademik mühitdən tamamilə uzaqlaşdırır, az-çox elmi savadı olan müəllimlər sıxışdırılaraq işdən çıxmağa vadar edilir. Yerdə qalanlar isə yalnız itaətkar və başqa yerlərdə iş tapa bilməyən savadsız kadrlardır.

Naxçıvanda kirvənin yeri başqadır

Fakültələrin idarə olunmasında yaxın qohum, tanış, quda və kirvə sözünün keçdiyini bildirən məktub müəllifi bildirib ki, namizədliyi hələ yenicə almış “mütəxəssislər” öz adamlarıdır deyə onların doktorluq müdafiəsi dərhal təsdiq olinur: “20 kitabı, 200-dən artıq elmi məqalələri olan əsl alimlər diqqətdən kənarda qaldıqları halda, istedadsız yaltaqlar irəli çəkilirlər”.