Fövqəladə Hallar Nazirliyinin Dövlət Yanğın Nəzarəti Xidməti Gəncədə dənli və texniki bitkilərin, eləcə də meşələrin yanğın təhlükəsizliyi tədbirlərinə həsr olunan konfrans keçirib. Məqsəd fermerlərin və meşə mühafizəsini həyata keçirənlərin diqqətini bu sahəyə yönəltmək olub.

Aparılan profilaktik tədbirlər nəticəsində ötən il Qərb bölgəsində dənli və texniki bitkilərin yığımı zamanı yanğın hadisəsi qeydə alınmayıb. Bu fikir FHN-nin Gəncə Regional Mərkəzində keçirilən konfransda səslənib. Tədbirdə həmçinin meşə zolaqlarının yanğından ciddi mühafizəsinə baxmayaraq Gədəbəy Meşə Mühafizəsi və Bərpası Müəssisəsinin balansında olan meşə massivində yanğın hadisəsinin qeydə alındığı bildirilib. Qərb bölgəsindən olan fermer və təsərrüfat sahibləri taxıl biçini zamanı təhlükəsizlik qaydaları haqqında məlumatlandırılıblar. Qeyd olunub ki, taxıl və ot yığımı zamanı texnikalar saz vəziyyətə gətirilməli, traktor və kombaynlar yanğınsöndürmə vasitələri ilə təmin olunmalı, sahələr tonqaldan və siqaret kötüklərindən mühafizə olunmalıdır. Əks təqdirdə bu kimi göstərişlərə əməl etməyənlərin sahələri yanğın təhlükəsi ilə üzləşə bilər. Bu kimi xoşagəlməz halların qarşısını almaq üçün tarla düşərgələri, taxıltəmizləmə xırmanları, ot və küləş tayaları yığılan sahələr mütləq ilkin yanğınsöndürmə vasitələri ilə təmin edilməlidir. Konfransda taxıl sahələrində baş verə biləcək yanğın hadisələrini əks etdirən video çarx nümayiş etdirilib və tədbir iştirakçılarına yanğına qarşı yaddaş kitabçaları paylanılıb.

http://kepeztv.az