Beynəlxalq Avtovağzal kompleksinə yaxın ərazidə yaranan çatlar müəyyən qədər böyüyüb.

Bakı-Sumqayıt şossesinin Beynəlxalq Avtovağzal kompleksinə yaxın hissəsində yolda çatlar genişlənib. ANS PRESS-in məlumatına görə, yolun şəhərə gedən hissəsində çatlarda nəzərə çarpan genişlənmə baş verməyib. Amma yolun Sumqayıt şəhəri istiqamətində yaranan çatlar müəyyən qədər böyüyüb.


Ərazidə işləyən əməkdaşların ANS PRESS-ə verdiyi məlumata görə, çatlarda genişlənmə son 15-20 gün ərzində baş verib. “Çatlar yolun o biri tərəfində əvvəldən var idi. Amma Bakıya yağan son intensiv yağışlardan sonra çatlar böyüməyə başlayıb”, - deyə əməkdaş bildirdi.
"Azəryolservis" ASC-nin mətbuat xidmətinin rəhbəri Anar Nəcəfli ANS PRESS-ə açıqlamasında bildirdi ki, Bakı Beynəlxalq Avtovağzalının yaxınlığında yeni çökmə baş verməyib. “Həmin ərazidə əvvəldən də çökmə var idi. Ərazidə yaradılan süni təpələrin üzərindəki ot qatı suvarılan zaman su torpağı yumşaldır. Bu səbəbdən yolun 5-6 metrlik hissəsində asfalt-beton örtüyü deformasiyaya uğrayıb. Həmin ərazidə avtomobillərin hərəkəti üçün heç bir təhlükə yoxdur”, - deyə Anar Nəcəfli qeyd etdi.
Onun sözlərinə görə, yolun avtovağzala tərəf olan hissəsində bərkitmə işləri aparılır. “İşlər yekunlaşdıqdan sonra yolun hər iki hissəsində asfalt-beton örtüyü götürüləcək. Torpaq bərkidildikdən sonra yola yeni asfalt örtüyü vurulacaq. Hazırda bərkitmə işlərinin bitməsini gözləyirik”, - deyə qurum rəsmisi bildirdi.
Ekologiya və Təbii Sərvətlər Nazirliyinin geoloji kəşfiyyat xidmətinin rəisi Ələmdar Piriyev isə ANS PRESS-ə açıqlamasında qeyd etdi ki, Bakı Beynəlxalq Avtovağzalı yaxınlığında sürüşmə prosesi getmir. “Həmin çatlar geoloji deyil, texnogen proseslər nəticəsində yaranır”, - deyə Ələmdar Piriyev bildirdi.

Avtovağzal yaxınlığında çatlar oktyabr ayının əvvəllərində yaranmağa başlayıb. Çökmə baş verən vaxt Bakı Avtovağzalı kompleksinin qarşısında, daha dəqiq desək, Sumqayıtdan Bakıya gələn avtobusların avtovağzala giriş istiqamətində istinad divarları əyilmişdi. Avtovağzalın yola yaxın hissəsində iri çatlar əmələ gəlmişdi. Ərazinin hər gün bir az daha qəzalı vəziyyətə düşdüyünü görən "Azəryolservis" ASC-nin əməkdaşları ərazidə ən böyük təhlükə mənbəyinə çevrilmiş istinad divarının söküntüsünə başlamışdılar. Hazırda həmin ərazidə təmir işləri davam etdirilir.