Yazıb diqqətinizə onu çatdırmaq istəyirik ki, bir neçə gün bundan əvvəl informasiya mərkəzimizə Ağdam rayonu ərazisində yaşanan çoxsaylı sosial problemlərin varlığı, rayonda həyata keçirilən idarəçiliyin daha çox Raqub Məmmədovun şəxsi maraqlarına cavab verməsi, yəni onun daşıdığı vəzifəsinə güvənərək yaxınlarına, qardaşı uşaqlarına, qohumlarına və.s lazımi şərait yaratması, icra hakimiyyəti aparatında müavin vəzifəsini daşıyan Arzu Rəhimovanın isə, əslən Kəlbəcər rayonundan olan Malik Məmmədovgilin ailəsinə, Ağdam rayonu “Dördyol-1” qəsəbəsində 05 fevral 2015-ci il tarixdə Qaçqınların və Məcburi Köçkünlərin İşləri Üzrə Dövlət Komitəsi tərəfindən 964 saylı mənzil verildikdə və həmin mənzil bir müddətdən sonra başqa bir kəlbəcərli məcburi köçkün ailəsi tərəfindən qeyri-qanuni yolla zəbt edilən zaman mübahisəli vəziyyət əmələ gəldikdə, onun qeyd olunan qəsəbə üzrə icra nümayəndəsi Valeh Kərimov haqda işlətdiyi ifadələr, yəni “o Valeh müəllim erməni əsillidir, özü də ermənidir, caamatı tovlayıb mənim üstümə qaldıran odur. Kəlbəcərlidirlər, kimlərdirlər bilmirəm, getsin Kəlbəcər rayon İcra Hakimiyyətinə müraciət etsinlər” deməsi haqda məlumatlar çatdırılıb. Daxil olan məlumatlar içərisində daha çox diqqətimizi cəlb edən Arzu Rəhimovanın Valeh Kərimov haqda işlətdiyi ifadədir ki, həm bunu, həm də informasiya mərkəzimizə daxil olan digər məlumatları əsas tutaraq, 19 yanvar 2016-cı il tarixdə Azerinfo.az saytında “Ağdamda icra başçısının müavini, hansı vəzifə sahibinin erməni olduğunu bildirir” başlıqlı tənqidi açıqlama dərc etmişik.
Elə bu səbəbdən də, yazıb Sizdən xahiş edirik ki, dərc etdiyimiz açıqlamada sadalanan faklara, ələlxüsus Valeh Kərimovun erməni əsilli, yaxud da erməni olub-olmamasına aydınlıq gətirilməsi, həmçinin informasiya mərkəzimizin də məlumat­landırıl­masını təmin etmək üçün, tabeçiliyinizdə olan şəxslərə müvafiq tapşırıqlarınızı verəsiniz.

Göstərəcəyiniz diqqətə görə əvvəlcədən minnətdarlığımızı bildiririk.