Şəhid ailələri, qazilərə, xəstə adamlara yardım adı ilə müxtəlif şəxslərin pul toplama kampaniyasına son qoyilmalıdır. Mən bir neçə adam tanıyıram ki, bu adla qısa müddət fəaliyyət göstərəndən sonra dəhşətli dərəcədə varlanıblar.
Bu yöndə olan ən böyük biabırçılıq son döyüşlərdə şəhid olan, SOS uşaq evində böyüyən Səbuhinin yas mərasimində yaşanıb.
Bunu AZİNFORUM.AZ saytının baş redaktoru Məhəmmədəli Qəribli deyir. Daha sonra Məhəmmədəli bəy deyir:
Bir qrup bloger mövzunun həssaslığını yaxşı dərk etdikləri üçün, Səbuhinin yas mərasimində dəftər qoyub pul yığıblar. Yasa gələnlər yığılan pulun Səbuhinin qardaşına çatacağını zənn etdikləri üçün gücləri çatanı yazdırıblar. Nəticədə pulu yığan blogerlər Səbuhinin qardaşına bir qəpik də verməyiblər.
Addımlarının səbəbini belə izah ediblər ki, bu pulu yas yiyəsi üçün yox, kimsəsiz uşaqlara yardım məqsədilə yığıblar. Adama deyərlər, ay əclaf, canın çıxsın get belə kampaniyanı öz səhifəndə keçir da. Camaatın yası sənin dələduzluğun üçün münbit məkandırmı?
Bir daha deyirəm, xeyriyyəçi adı ilə bu işlə məşğul olanların çoxunun məqsədi öz mənffətini güdməkdir. Belə fəaliyyətlə məşğul olmaq həm fərdi şəxslərə, həm də televiziyalara qadağan edilməlidir.
Məhəmmədəli Qəribli