Məlum olduğu kimi, bu ilin fevral ayının 14-də Azərbaycan Milli Elmlər Akademiyasının (AMEA) Rəyasət Heyətinin iclasında qurumun prezidenti Ramiz Mehdiyevin istefa ərizəsi müzakirə olunub və qəbul edilib.
Yeniavaz.com xəbər verir ki, Ramiz Mehdiyevin istefa ərizəsinin qəbulundan 4 aya yaxın vaxt ötsə də, AMEA-nın rəsmi saytında sabiq prezidentin özünün və ailə üzvlərinin hələ də yüksək vəzifələr daşıdığı qeyd olunur.
Məlumat üçün bildirək ki, AMEA-nın rəsmi saytında yer alan məlumatlara görə Ramiz Mehdiyev hazırda Azərbaycan Respublikası Elmi Tədqiqatların Əlaqələndirilməsi Şurasının sədri vəzifəsini icra edir.
Bundan başqa Ramiz Mehdiyev həyat yoldaşı - riyaziyyat elmləri doktoru, professor Mehdiyeva Qalina Yuryevna hazırda AMEA İdarəetmə Sistemləri İnstitutunun nəzdində yaradılan “Kompüter elmləri” ixtisası dissertasiya şurasının sədri vəzifəsini icra edir.
Ramiz Mehdiyevin qızı - psixologiya elmləri doktoru, Bakı Dövlət Universitetinin Sosial və pedaqoji psixologiya kafedrasının müdiri Kamilə Ramiz qızı Əliyeva hazırda atasının sədrlik etdiyi Elmi Tədqiqatların Əlaqələndirilməsi Şurasının Psixologiya və sosiologiya üzrə elmi şurasının üzvüdür.
Ramiz Mehdiyevin kürəkənin qardaşı - Fikrət Əli Səftər oğlu Əliyev isə hazırda AMEA İşlər İdarəsi müdirininmüavini vəzifəsini icra edir.