Teref.az yazır ki, aşağıdakı postu rəhmətlik qazimizə əskər Gündüz Ağazadə tərəfindən ittiham - rekviemdə saymaq olar! Ağır olsada yazını təqdim edirik:
Dünən haqqında yazdığım xərçəng xəstəliyindən vəfat edən qazimiz, komandirim olmuş baş leytenant Aydın Həzrətovun son fotolarındandır.
Aydın Həzrətov Aprel döyüşlərində yanında minamyot partlaması nəticəsində başından travma almışdı, amma həmin dövrdə lazımi qurumlara müraciət etməmişdi, orduda qalmışdı. Mən 2018-2019-cu illərdə onunla xidmətdə olmuşam, artıq o vaxtlarda danışığında qüsurlar yaranmağa başlamışdı.
Həyat yoldaşı Ülviyyə xanımın dediklərinə görə, 2022-ci ildə evə gəlir və deyir ki, onda ciddi problemlər var, maşın sürəndə səhvən postu keçir, sərhəddə tərəf gedir və sonra ayılıb geri qayıdır. Evdəkilərin məsləhəti ilə həkimə müraciət edir və məlum olur ki, beynində bədxassəli şiş (xərçəng) əmələ gəlib. Aydın Həzrətovu ordudan tərxis ediblər, vaxtında müraciət etmədiyi üçün sənədə müharibədə aldığı travma yazılmayıb, "hərbi xidmət zamanı" yazılıb. Maraqlısı və dəhşətlisi odur ki, bu hala düşmüş adama ƏƏSMN 3-cü dərəcəli əlillik verib. 1 yox, 2 də yox, 3-cü dərəcəli... Müalicəsi üçün həkimlər Türkiyəyə getməyi məsləhət görüblər. Ailə "YAŞAT" fonduna müraciət etsə də, heç bir müsbət cavab gəlməyib.
Müxtəlif kanallara, bloggerlərə müraciət ediblər, çəkiliş üçün gələn də olmayıb. Qazi Aydın Həzrətov bir müddət davam edən və ağırlaşan xəstəlikdən sonra dünən vəfat edib.
O, bu vətən üçün can qoymuşdu, onun özünə isə 50-60 minlik xərci bu vətən çox gördü. "Bizim Qazimiz, şəhidimiz, başımızın tacı" deyib bar-bar bağıran insanların 99%-i saxtadır, YAŞAT fondu heç bir işə dərman deyil, ƏƏSMN isə xalqın pulu, vergisi, nefti ilə maliyyələşir və xalqa qənim kəsilir.
Bağışla bizi, cənab baş leytenant!
Gündüz Ağazadə
Teref.az əlaqədar təşkilatlrın cavabını gözləyir və dərc edəcəyinə söz verir!