Görüntülərdə Gəncənin icra başçısı dövlət başçısına xəyanətdə və bir sıra qanunsuzluqlarda ittiham edilir

Gəncənin icra başçısı Elmar Vəliyevlə bağlı Youtube.com saytında ilginc video yayılıb. Redaksiyamız xəbər verir ki, videogörüntülər iki gün əvvəl «Azerbaijan Anonymous» haker qrupu tərəfindən «Gəncənin icra başçısı Elmar Vəliyevin cinayətləri» adı altında yayımlanıb.

Həmin görüntülərdə əsas ağırlıq Vəliyevin keçmiş Prezident Heydər Əliyev, hazırkı Prezident İlham Əliyevə xəyanət etdiyi, onun bir sıra qanunsuzluqlara yol verdiyi, habelə dindarlara normal şəkildə öz ayinlərini keçirməyə imkan vermədiyinin üzərinə qoyulub.

Redaksiyamız xəbər verir ki, videonu paylaşanlar orada maraqlı müqayisələr aparıblar. Belə ki, Aşura Mərasiminin bütün ölkədə heç bir qarşıdurma olmadan, yerli icra orqanlarının dəstəyi ilə keçirildiyi kadrlarla nümayiş olunub. Amma Gəncədə dindarların Aşura günü döyüldüyü, onları İmamzadənin qarşısından qovulduğu və həbs edildiyinə dair çəkilişlər qeyd edilib.

Görüntüləri yayan «Azerbaijan Anonymous» qrupu Elmar Vəliyevi dövlət başçısının siyasətinə qarşı çıxmaqda, həm də dövlətə xəyanət etməkdə ittiham edib. Bu səbəbdən də ölkə rəhbərliyinə müraciət edərək, Gəncənin icra başçısının cəzalandırılmasını istəyiblər.