Əmək və Əhalinin Sosial Müdafiəsi Nazirliyi nəzdində Əmək və Sosial Problemlər üzrə Elmi-Tədqiqat və Tədris Mərkəzin bir qrup sabiq əməkdaşı ölkə Prezidenti İlham Əliyev və Birinci vitse-prezident Mehriban Əliyevaya müraciət edərək əmək hüquqlarının pozulduğunu bildiriblər.
İsgəndərov İlqar, Tahirova Mahirə, Salmanova Aybəniz, Hüseynova Rəsmiyə, İbrahimova Sevinc, Mirzəyeva Zülfiyyə, Əhmədova Nərgiz, Məmmədova Fidan, Bəhmənli Nərminin müraciətində bildirilir ki, 18.01.2019-cu ildə ƏƏSMN-nin strukturunun və idarə edilməsinin təkmilləşdirilməsi ilə bağlı ETTM ləğv edilib. 1 ay sonra nazir müavini Anar Əliyev (O, həmçinin ETTM-in kuratoru olub) ETTM-ə gələrək işçilərlə görüşüb və yaradılacaq yeni qurumda hər birinin işlə təmin olunacağını bildirib.
Mart ayında pandemiyanın başlamasıyla əlaqədar Nazirlər Kabinetinin 20.03.2020 ci il tarixli Qərarına əsasən, 29.03.2020-ci ildən dövlət idarə və təşkilatlarının əməkdaşları əmək haqqı saxlanılmaqla ödənişsiz məzuniyyətə göndəriliblər. Bu siyahıda ETTM-in də adı vardı:
“Bu ərəfədə bizi -29 işçini idarədən çağırdılar və ərizə yazmalı olduğumuzu bildirdilər. İlk ərizə ödənişsiz məzuniyyətə buraxılmağımız barədə oldu. Daha sonra həmin məktubun səhv yazıldığını bildirdilər. Öz xahişimizlə işdən azad olunmağımız barədə ərizə yazmağımız tələb olunduqda, buna eitraz etdik. Çünki biz ləğv edilmiş idarədən Əmək Məcəlləsinin 70-ci maddəsinin “a” bəndi ilə işdən azad edilməli idik.
Beləliklə, Əmək Məcəlləsinin 70 maddəsinin “a” bəndi ilə qorunan hüqüqlarımız pozuldu. Əmək Məcəlləsinin 44-cü maddəsinin 3-cü bəndinə əsasən, bizimlə müqavilə bağlanılmalı və müqavilənin 1 nüsxəsi möhürlü şəkildə bizə verilməli idi. Beləliklə, bizim ƏM-nin 44-cü maddəsinin 3-cü bəndi ilə qorunmuş əmək hüquqlarımız pozuldu.
Aprel ayında tam olaraq evdə olduq, may ayında da əmək fəliyyətimizi evdə davam etdirdik. İyun ayının əvvələrində işə getməyə başladıq. Həmin dövrdə 3 ay ərzində maaşımızın yarısını aldıq. Təqribən 20 gün işə getdikdən sonra yenə iş fəaliyyətimizi distant şəkildə yerinə yetirməli olduq.
29.06.2020-ci ildə idarənin İnsan resursları şöbəsinin mudiri Aytən Rzayeva hər kəsi 2 saatlıq SMS icazə ilə idarəyə çağırdı. Bildirildi ki, işə qəbul olmağımız barədə əmək müqaviləsini imzalamaq lazımdır. Pandemiya ilə əlaqədar kütləvi toplaşmaq qadağası olduğu üçün müaviləni qısa müddətdə oxumadan imzaladıq.
30.06.2020-ci ildə yenidən zəng vasitəsilə Observatoriyaya çağırıldıq. Burada isə 12 nəfərin Əmək Məcəlləsinin 47-ci maddəsinin “f” bəndi ilə işə götürülmədiyi bildirildi.
02.07.2020-ci ildə işdən azad olunan 12 nəfər nazir müavini Anar Əliyevin qəbuluna düşmək üçün nazirliyə getdik. Nümayəndəmiz nazirliyin Kadrlar şöbəsinin müdiri Nərmin Bayramova ilə görüşdü. Görüşdə N.Bayramova bildirdi ki, nazirlik Obseravtoriyadan 12 işçinin işdən azad edilməsindən xəbərdar deyil. Observatoriyanın sədr müavini E.Əsədovun işçini işə qəbul edib, işdən azad etmək hüququ var. Azərbaycan Respublikasının 1-ci vitse-prezidenti Mehriban Əliyevaya, nazir Sahil Babayeva, Ombudsman Aparatına, Baş Prokurorluq yanında Korrupsiya İdarəsinə məktubla müraciət etdik.
1-ci vitse-prezidentə ünvanladığımız məktubu ƏƏSMN-nin Aparat rəhbəri Fuad Musayev cavablandıraraq bizə qarşı heç bir hüquq pozuntusunun olmadığını, bizim qanunla işdən azad olunduğumuzu, bizim işlə təmin olunmağımız üçün çağırıldığımızı və bizim bundan imtina etdiyimizi bildirdi. Halbuki bizi heç kim rəsmi qaydada işə dəvət etməyib”.

Şikayət müəllifləri bildiriblər ki, onlarnı işlə təmin olunacağına dair məqam əmək və əhalinin sosial müdafiəsi naziri Sahil Babayevin ölkə başçısına məruzəsində də əksini tapıb. Belə ki, nazirin dövlət başçısına məruzəsində “Həmçinin məruzə edirəm ki, Sizin “Azərbaycan Respublikası Əmək və Əhalinin Sosial Müdafiəsi Nazirliyinin strukturunun və idarə edilməsinin təkmilləşdirilməsi ilə bağlı tədbirlər haqqında” 2019-cu il 18 yanvar tarixli 480 nömrəli Fərmanınızın 2.2-ci bəndinə əsasən Əmək və Əhalinin Sosial Müdafiəsi Nazirliyinin Əmək və Sosial Problemlər üzrə Elmi-Tədqiqat və Tədris Mərkəzinin (bundan sonra Mərkəz) ləğv edilməsi ilə bağlı tədbirlər görülməsi tapşırılmışdır. Bunula əlaqədar olaraq ləğv ediləcək Mərkəzin ixtisar olunan işçilərinin məşğulluğunun diqqət mərkəzində saxlanılmasının və sərbəstləşən işçilərin işlə təmin olunmasının xüsusi əhəmiyyət kəsb etdiyini nəzərə alaraq onların yeni yaradılacaq publik hüquqi şəxsdə işlə təmin olunması həyata keçiriləcəkdir”,-deyə vurğulanıb.

İşdən azad edilən 44 yaşlı İbrahimova Sevinc Elxan qızının bildirdiyinə görə, o, bu sistemdə 20 il əmək stajına malik olduğu halda heç bir səbəb göstərilmədən işlə təmin olunmayıb.
“Köhnə qurumun ləğv olunması səbəbi ilə yeni quruma transfer olunmuş 29 içşi idik. 20 il əmək stajım olmağına baxmayaraq, məni məqsədli şəkildə 3 aylıq müddətli müqavilə ilə işə götürüb, 3 ayın tamamında isə heç bir səbəb göstərmədən işdən çıxarıblar. Bununla bağlı bir çox aidiyyəti qurumlara şikayət etməyimizə baxmayaraq, heç kim üçün taleyimiz maraqlı olmayıb. Bundan sonra 9 nəfər məhkəməyə müraciət edib. Binəqədi Rayon Məhkəməsində hakim Səadət Səlimovanın rəhbərliyi ilə keçirilən məhkəmədə qərar işçilərin xeyrinə olub. Eyni zamanda, mənim məhkəməmə Dövlət Əmək Müfəttişliyindən nümayəndəsi dəvət olunub. Elə məhkəmə zalında işlə tanış olub və yekun qərarı yenə də mənim xeyrimə verib”.
Ancaq şikayətçinin sözlərinə görə, Bakı səhəri, Binəqədi Rayon Məhkəməsinin 2(001)-1732/2021 nömrəli, 02.04.2021-ci il tarixli qətnaməsinə əsasən işə bərpa olunmaq əvəzinə qarşı tərəf apelyasiya sikayəti verib.
İndi keçmiş əməkdaşlar əmək hüquqlarını hansı müstəvidə və necə müdafiə edəcəklərini bilməyərək çıxılmaz durumda qalıblar.

Reportyor.info