Bu gündən "Bakı Metropoliteni" QSC-də sərnişindaşıma fəaliyyətini iyulun 20-dək tamamilə dayandırıb.
Bunu "Ölkə.Az"a açıqlamasında “Bakımetropoliteni”QSC-nin mətbuat xidmətinin rəhbəri Bəxtiyar Məmmədov deyib.

Onun sözlərinə görə, Nazirlər Kabineti yanında Operativ Qərargah iyulun 2-də verdiyi qərara əsasən Bakı metropoliteni 2020-ci il 4 iyul saat 00:00-dan 20 iyul saat 06:00-dək sərnişindaşıma fəaliyyətini dayandırır.

“Bu müddət ərzində metro işləməyəcək. Sadəcə zəruri texniki işlər və xidmət üzrə sahələri fəaliyyət göstərəcək”,- B. Məmmədov deyib.
B. Məmmədov bildirib ki, bu müddət ərzində ancaq yerüstü nəqliyyat vasitələri işləyəcək.

Qeyd edək ki, COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə Goranboy, Göygöl və Mingəçevir şəhərləri, Bərdə, Xaçmaz, Samux, Siyəzən və Şəki rayonları daxil olmaqla, Bakı, Cəlilabad, Gəncə, Lənkəran, Masallı, Sumqayıt, Yevlax şəhərlərində və Abşeron rayonunda xüsusi karantin rejimi 2020-ci il 5 iyul saat 06:00-dan 20 iyul saat 06:00-dək uzadılır.