Dövlətin vətəndaşlarının qayğısına qaldığının nümayiş etdirildiyi bir vaxtda bu qurumun sakinləri soyuqdan qırmaqla hədələmə kimi təxribatçı addımı başadüşülən deyil

Azərbaycan Respublikası Nazirlər Kabineti yanında Operativ Qərargahın qəbul etdiyi qərara uyğun olaraq ölkədə tətbiq edilən karantin rejiminin sərtləşdirildiyi və martın 31-dən aprelin 20-ə qədər market və digər ərzaq mağazaları və əczaxanalar istisna olmaqla, əhalinin evdən bayıra çıxması qadağan olunduğu, bunun müqabilində dövlətin bir sıra güzəştlər hazırladığı bir dövrdə bəzi strateji əhəmiyyətli təşkilatlar əhalini göstərilən xidmətləri dayandırmaqla hədələyir. Bu hallar isə dövlətin bütün vətəndaşlarının qayğısına qaldığının nümayiş etdirildiyi bir vaxtda istər-istəməz əhali arasında narazılıq yaradır.

Misal üçün qeyd edək ki, bayram günlərində “Azərişıq” ASC-nin Bakı şəhəri Nizami və Yasamal rayonları ərazilərində “İstifadə olunan elektrik enerjisinin borcuna görə 23.03.2020 tarixdə saat 10.00-dan etibarən borclu abonentlərin elektrik enerji verilişi xəbərdarlıq edilmədən dayandırılacaq” məzmunlu elanlar barədə mediada xəbərlər yayılmışdı. Bu xəbərlərə bir-iki gün gec olsa da, “Azərişıq”dən reaksiya verildi və ASC-nin mətbuat xidmətinin rəhbəri Tanrıverdi Mustafayev yayılan elanların “Azərişıq” ASC-yə heç bir aidiyyəti olmadığını, həmin məlumatların həqiqəti əks etdirmədiyini və cəmiyyətdə çaşqınlıq yaratmağa hesablandığını bəyan etdi.

Hazırkı durumda özbaşına kiminsə elan çap etdirib binaların bloklarına, mənzillərin qarşısına elan asması ehtimalının bir qədər həqiqətəuyğun olmadığını sakinlər daha yaxşı bilsələr də, “Azərişıq” ASC tərəfindən verilən təkzib və bu elanların davamının gəlməməsi cəmiyyətdə bir qədər rahatlıq yaratdı.
Lakin iş yerlərinin fəaliyyətinin dayandırıldığı və əhalinin əksər təbəqəsinin evdə qalmağa çağırıldığı, karantin rejiminin gətirdiyi qadağalara uyğun olaraq yüzlərlə təhsil müəssisələrinə istilik enerjisinin dayandırıldığı bir vaxtda “Azəristiliktəchizat” Açıq Səhmdar Cəmiyyəti (ASC) mövcud qeyri-müəyyən vəziyyətdə əhalinin üstünə “hücuma keçib” və qurum adından paytaxtın bəzi rayonlarında binaların bloklarınn giirşlərinə xəbərdarlıq elanları yapışdırılıb. AzToday.az xəbər verir ki, Suraxanı rayonu ərazisindəki binaların bloklarına yapışdırılan elanın məzmunu isə bu şəkildədir: “Azəristiliktəchizat” ASC. SAKİNLƏRİN NƏZƏRİNƏ. Xahiş edirik 3 gün müddətinə istilik borclarınızı ödəyəsiniz. əks təqdirdə 29.03.2020-ci il tarixdə binanın istilik təchizatı dayandırılacaq”.



Nədir bu? Hazırkı durumda bunu bir adı ola bilər: Dövlətin bütün vətəndaşlarının qayğısına qaldığının nümayiş etdirdiyi, kommunal borclarla bağlı güzəştlər ediləcəyi barədə sevindirici xəbərlərin yayıldığı bir vaxtda onsuz da mənbəyi bəlli olmayan bəla ilə əlləşən mövcud hakimiyyətdən əhalini narazı salmaq. Təəssüf doğuran odur ki, evdə qalmağa məcbur olan sakinləri həm də soyuqdan qırmaqla hədələyən “Azəristiliktəchizat” ASC dövlətin sosial və kommunal siyasətini həyata keçirən strateji müəssəsələrdəndir. Buna görə də “Azəristiliktəchizat” ASC-nin bu cür təxribatçı addımlarla məşğul olması başadüşülən deyil. Adı hallanan əlaqədar qurumun bu məsələyə münasibəti doğrudan da mühüm əhəmiyyət kəsb edir.