Koronavirus pandemiyasına qarşı mübarizə lazımi effekti vermir. Hər gün onlarla insan bu qorxunc xəstəliyə təslim olur. Tibb elmi koronavirusu cilovlamaqda acizdir.

Koronavirusun fəsadlarını saymaqla qurtaran deyil. Uca Allahın mərhəmətinə bel bağlamışıq. İnşallah, bəşəriyyət bu bəladan daha az itki ilə xilas olar.

Koronavirusun müsbət tərəfləri varmı? Başa düşürəm, sual adamın ətini ürpədir. Qınamayın, bu qədər bəlanın içində bir-iki müsbət məqam tapa bilmişəm. Birincisi odur ki, koronavirus ölümü insanların yadına saldı. Bəzi adamlar elə bilirlər ki, onlar qarğa kimi 300 il yaşayacaqlar. Buna görə də oturduqları döşəyin altına 300 illik azuqə yığmaqla məşğuldurlar. Koronavirus bəzi adamlara başa saldı ki, bəla qapının ağzını kəsəndə, yığdığınız var-dövlətin, sərvətin sizə heç bir köməyi dəyməyəcək. Adam olun, adam!

Zəngin olmaq ehtirası insanı çox bəlaya düçar edib. Hamı varlı olmaq, yağ-bal içində üzmək istəyir. Məmur var ki, yığdığı yeddi arxa dönəninə bəs edər, amma yenə gözü doymur. Toyuq su içəndə Allaha baxır, amma bizim məmurlar rüşvət alanda sağa-sola baxır ki, görən olmasın. Əvvəl Ağstafanın, sonra Neftçalanın icra başçısını həbs etdilər. Bir dəfə yazmışdım ki, bizim məmurların bir donuzu kəmdir. İcra başçılarının həbsindən sonra məlum oldu ki, donuzları olmasa da, eşşək fermaları varmış. Var-dövləti başından aşan adam süpürgəçinin, bağbanın, gözətçinin maaşına niyə göz dikməlidir? Doğrudanmı, siz bu qədər Allahsız, vicdansız adamlarsınız? Niyə fikirləşmirdiniz ki, Alalh adamın başına elə qapaz vurar ki, süpürgəçinin maaşına dikilən gözləri çıxıb ovcuna düşər?

ETSN-in Qəbələ Regional Meşə Təsərrüfatı Mərkəzinin direktoru İlqar Qəribovun həbsiylə bağlı xəbəri ilk dəfə bizim sayt yazıb. Sonra DİN məsələnin təfərrüatını açıqladı. Məlum oldu ki, Qəribovun rəhbərlik etdiyi mütəşəkkil dəstə 200-250 il yaşı olan ağacları kəsməklə məşğul imiş. O bölgədə yaşayan dostum deyir ki, Oğuz-Qəbələ meşələri neçə illərdi bu dəstənin “soyqırımına” məruz qalıb.

Ay zalım, yüz ağac kəsəndə, heç olmasa, bir ağac da əkərdin. Bilmirdin ki, sən ağacları kəsəndə, Allah da ruzunu kəsəcək?

Ağsunun bir icra başçısı vardı, işdən çıxdığı üçün adını yazıb, söyüş hədəfinə çevirmək istəmirəm. Üç-dörd ay əvvəl Vəsilə Məmmədova adlı bir qadın mənə müraciət etmişdi. Vəsilə xanım xərçəng xəstəsiydi, bu dünyada sayılı günləri qalmışdı. Deyirdi ki, evi zəlzələdən dağılıb, amma heç kim onu təmir etmir. Bir neçə dəfə icra başçısının yanında olmuşdu. Başçı, “kimə istəyirsən, şikayət elə” - deyib, qapıdan qovmuşdu. Axırda başçının özünü işdən qovdular...

O vaxt “Məmurlar ceyran qovalayır, vətəndaş qan ağlayır” adlı məqalə yazıb, icra başçısını öz vəzifə borcunu yerinə yetirməyə səsləmişdim. Amma məni eşitmədi. Bu yaxınlarda eşitdim ki, Vəsilə xanım “ev” deyə-deyə dünyadan köçüb.

Vəzifəli şəxslərin arasında bu cür qansız adamlar az deyil. Onlar koronavirusdan da təhlükəlidir. Bu günə kimi koronavirusa yoluxan minlərlə insan həkimlərin səyi nəticəsində bu qorxunc xəstəlikdən xilas ola bilib. Onlar isə yoluxduqları rüşvət mərəzindən heç cür xilas ola bilmirlər...

Seymur VERDİZADƏ //yenisabah.az//