Milli Məclisin bu gün keçirilən plenar iclasında çıxış edən deputat Elman Məmmədov Nazirlər Kabinetinin 2017-ci ildə məcburi köçkünlərlə bağlı qəbul etdiyi qərarını tənqid edib.

O qeyd edib ki, ölkə başçısı bütün çıxışlarında məcburi köçkünlərə, şəhid ailələrinə, əlillərə diqqətlə yanaşılmalı olduğunu vurğulayıb:

“Hökumət də bu sahədə dövlət başçısının qarşıya qoyduğu vəzifələri icra edir və etməyə çalışır. Amma bəzən kimlərinsə mövqeyi nəticəsində elə qərarlar verilir ki, bu qərarlar məcburi köçkünlər statusuna malik olan bir qrup insanın yolunun bağlanmasına gətirib çıxarır. Məsələn, mən Nazirlər Kabinetinin 2017-ci il 24 yanvar 11 nömrəli qərarını diqqətinizə çatdırıram. Bu qərarda müavinətlərin ödənilməsi qaydası öz əksini tapıb. İstəyirəm ki, hökumət üzvləri məcburi köçkün düşdükdən sonra mənzil qanunvericiliyinə və ya mülki-hüquqi əqdlərə əsasən ayrıca yaşayış sahəsi əldə edən, sonradan həmin yaşayış sahəsini başqa şəxsə satan, bağışlayan məcburi köçkünlərə və onlarla birlikdə yaşayan ailə üzvlərinə müavinət verilməməsini nəzərdə tutan qərara diqqət yetirsinlər. Bu ziddiyyət təşkil edir axı?!

Digər bir bənddə isə qeyd edilib ki, məcburi köçkün olan qadın məcburi köçkün olmayan birinə ərə gedibsə, onlardan olan uşağa müavinət verilməsin. Bu, hansı məntiqə sığır?”.

Milli Məclisin vitse-spikeri Bahar Muradova da çıxışında deputatın fikirlərinə dəstək verib. O qeyd edib ki, seçildiyi Füzuli rayonunda da belə problemlərlə bağlı seçiciləri ona müraciət edirlər: “Hökumətdən xahiş edirəm ki, bu məsələni diqqətdə saxlasın. Biz getdikcə artan bu problemin qarşısını alaq”.