Həyat yerində durmur, qarşıya yeni vəzifələr qoyulur, yeni çağırışlar qarşımızda durur. Yaşınız da artıq 75-i keçibdir və əlbəttə ki, daha gənc nəslə yol vermək lazımdır” – Bunu prezident İlham Əliyev baş nazirin müavini vəzifəsindən azad olunan Hacıbala Abutalıbovla görüşdə deyib.
Yaşlı məmurlara mesaj ünvanlayan İlham Əliyev deyib: “Ona görə Sizin ərizə ilə mənə müraciətinizi yüksək qiymətləndirirəm. Hesab edirəm ki, pensiya yaşına çatmış, hər halda 70 yaşını keçən iqtidarda təmsil olunanlar da yəqin ki, Sizin nümunənizi təkrar edəcəklər. Hər halda mən buna ümid edirəm”.
Qeyd edək ki, baş nazirin keçmiş müavini Əli Həsənovla görüşdə də Prezident gənc kadrlara yer verməyin vacib olduğunu qeyd edib: “Siz pensiya yaşına çatmısınız, 71 yaşınız var və əlbəttə, gənc kadrlara yer vermək üçün hesab edirəm ki, Siz yaxşı nümunə göstərirsiniz. Ümid edirəm ki, iqtidar komandasında təmsil olunan digər yoldaşlara da bu, yaxşı bir örnək olacaqdır”.
Bunun ardında ölkə başçısı sərəncam verərək, Prezident Administrasiyasının rəhbəri Ramiz Mehdiyevi işdən çıxardı.
Qeyd edək ki, Prezident Əliyev hakim komandadakı yaşlı məmurların gənc kadrlarla əvəzlənməsinin zəruriliyini bir qədər əvvəl – oktyabrın 15-də keçirdiyi iqtisadi müşavirədə bəyan etmişdi. Dövlət başçısı oxşar fikirləri bundan əvvəl keçirdiyi müşavirələrdə, görüşlərində də açıqlayıb. Ancaq bu gün Prezidentin iqtidar komandasında təmsil olunan yaşlı məmurlara daha açıq mesaj verdiyini söyləyə bilərik.
Prezidentin mesajının ünvanlandığı şəxslərdən biri də “Meliorasiya və Su Təsərrüfatı” ASC – nin sədri cənab Əhməd Əhmədzadədir. Doğrudur, onun yaşının 74 olması ilə əlaqədar vəzifədən getməsi şöhrətinə xələl gətirməyəcək, “Şöhrət” ordeni də özündə qalacaq. 2008-ci ildən Azərbaycan Meliorasiya və Su Təsrrüfatı Açıq Səhmdar Cəmiyyətində – Aparatın rəhbəri vəzifəsində işləyən 1949-cu ul təvəllüdlü Cahan Məmmədov da bu kateqoriyaya aiddir. Adam 40 il əvvəl sosializm yarışının qalibi olub. Elə o təfəkkürlə də indi “Meliorasiya və Su təsərrüfatı” ASC-nin tabeliyində olan rayon suvarma sistemləri idarələrinə kuratorluq edir, idarə rəislərinin “qara-qura” əməllərini “təmənnasız” ört-basdır etməklə məşğuldur. Bu isə ümumən ASC-nin işinin səmərəsini azaldan, idarə rəislərinin haram qazanclarını artırmağa xidmət edən destruktiv fəaliyyətdir. Cahan Məmmədovun barəsində saytımızda oxucularımızla əvvəlki görüşlərimizdə tənqidi məqalələrlə çıxış etmişdik. Bu yazıda həmin məqalələrdə toxunduğumuz məqamları təkrarlamaq fikrindən uzağıq.
Biz sadəcə haqlı bir suala cavab axtarırıq: Yaş prizmasından yanaşanda Prezident aparatının rəhbəri əvəzolunandırsa, səhmdar cəmiyyətin aparat rəhbəri necə vazkeçilməz kadr ola bilər ki?
RealMedia.az