Prezident İlham Əliyev oktyabrın 21-də Baş Nazirin müavini Hacıbala Abutalıbovu vəzifədən azad edilməsiylə bağlı verdiyi ərizə ilə əlaqədar qəbul edib.

Qəbulda dövlət başçısı Hacıbala Abutalıbovun xidmətlərini yüksək qiymətləndirərək onun işdən azad olunması ilə bağlı prezidentə ərizə ilə müraciət etməsini yüksək dəyərləndirib.

"Həyat yerində durmur, qarşıya yeni vəzifələr qoyulur, yeni çağırışlar qarşımızda durur. Yaşınız da artıq 75-i keçibdir və əlbəttə ki, daha gənc nəslə yol vermək lazımdır. Ona görə sizin ərizə ilə mənə müraicətinizi yüksək qiymətləndirirəm. Hesab edirəm ki, pensiya yaşına çatmış, hər halda 70 yaşını keçən iqtidarda təmsil olunanlar da yəqin ki, sizin nümunənizi təkrar edəcəklər. Hər halda mən buna ümid edirəm. Siz Yeni Azərbaycan Partiyasında da fəal iş görürsünüz. Hesab edirəm ki, bundan sonra da partiya tərkibində siz öz fəaliyyətinizi davam etdirməlisiniz. Sizə gələcək fəaliyyətinizdə uğurlar arzulayıram və gördüyünüz işlərə görə təşəkkürümü bildirirəm", - deyə dövlət başçısı bildirib.

Qlobal.az olaraq qeyd edək ki, yaşı 70-i keçən məmurlardan biri də Meliorasiya və Su Təsərrüfatı Açıq Səhmdar Cəmiyyətinin sədri Əhməd Əhmədzadədir.

Əhməd Əhmədzadə artıq 26 ildir ki, bu vəzifədə çalışır. Belə ki, Ə. Əhmədzadə 1993-cü ildən 2004-cü ilə qədər Nazirlər Kabineti yanında Meliorasiya və Su Təsərrüfatı Komitəsinin sədri, 2004-cü ildən 2006-cı ilə qədər Kənd Təsərrüfatı Nazirinin birinci müavini, Kənd Təsərrüfatı Nazirliyi yanında Dövlət Meliorasiya və Su Təsərrüfatı Agentliyinin baş direktoru, 2006-cı ildən bu günədək isə Azərbaycan Meliorasiya və Su Təsərrüfatı Açıq Səhmdar Cəmiyyətinin Sədri vəzifəsində çalışır.