Deputat Aytən Mustafayeva son dövrlərdə məişət zorakılığı hallarının artmasından narahatlığını bəyan edib.
Bunu deputat Aytən Mustafayeva Milli Məclisin bu gün keçirilən plenar iclasında müzakirəyə çıxarılan “Məişət zorakılığının qarşısının alınması haqqında” qanuna dəyişiklərin müzakirəsi zamanı deyib.

Onun sözlərinə görə, son dövrlərdə ailə zorakılığı çox artıb. “Bir neçə gün əvvəl "Avtovağzal" metrostansiyası yaxınlığında ər uşaqlarının gözü qabağında arvadını bıçaqlayıb. Ətrafdakılar prosesə müdaxilə edib, buna imkan verməmək əvəzinə, hərə əlinə bir telefon alaraq hadisəni lentə alıb. Bu hadisə də uşaqların gözü qarşısında baş verib. Bir kişi çıxmayıb ki, ona bir yumruq vursun, qadını onun əlindən alsın”.
Deputat əlavə edib ki, bundan əlavə bir şəxs metroda kiminsə dediyi söz xoşuna gəlmədiyi üçün bıçaqlayıb. “Bəs polis hara baxır? Heç olmasa, metroda insanların üzərində bıçaq olub-olmadığını polislər yoxlasın. Bu saədə qanunvericilik təkmilləşdirilməli, sərtləşdirilməlidir. Bununla bağlı Milli Məclisdə komitələrində müzakirə aparılmasına ehtiyac var. Yeri gəlmişkən, bir müddət əvvəl balta ilə qətlə yetirilən qadınla bağlı hadisəyə də münasibət bildirmişdim. Ancaq bir müğənni sonradan çıxıb dedi ki, yəqin qadının nəsə günahı olub. Bu, necə müğənnidir?! Bu hallara son vermək lazımdır. Həyəcan təbili çalınmalıdır”.
Millət vəkili Məlahət İbrahimqızı da həmkarını dəstəkləyib, bu kimi məsələlərə ziyalıların həssas münasibət ortaya qoymasını zəruri sayıb. O deyib ki, özünü ana müxalifət partiyası hesab edən AXCP sədrinin müavini Fuad Qəhrəmanlı öz ailəsinə qarşı fiziki zor işlədib.

Deputat bildirib ki, YAP-dan başqa nə QHT-lər, nə də hüquq müdafiəçiləri lazımi reaksiya vermədi.”Cəmiyyətdə bu cür cinayət hadisələrində həmrəylik olmalıdır. Hüquq müdafiəçilərinin bu cür məsələlərə ikili münasibətləri yol verilməzdir. Nə qədər ki, belə yanaşma olacaq məişət zorakılığına qarşı mübarizə lazımi effekt verməyəcək. Odur ki, məişət zorakılığına yol verən şəxsə, cəmiyyətdə hansı mövqe tutmasından asılı olmayaraq, ciddi reaksiya olmalıdır. Bax, onda mübarizənin effekti olacaq”, - M. İbrahimqızı deyib.