Sabah Dərbənddə “Sadval”ın da iştirakı ilə ləzgilərin Yaraliyevə dəstək aksiyası keçiriləcək.
Azerinfo.az bildirir ki, bu barədə Axar.az-a Dərbənddəki mənbədən məlumat daxil olub.

Aksiyada 2000 nəfərin iştirakı gözlənilir. Onlar müxtəlif ləzgi kəndlərindən artıq Dərbənd şəhərinə axışırlar.

Dərbənd rəhbərliyi isə azərbaycanlıların hansısa aksiya keçirməsinə icazə verməyib. Həmyerlilərimizin bunun qarşılığında Dərbənddəki klublardan birində toplaşaraq Yaraliyevin rəhbərliyinə etiraz edəcəklər.

Dərbənddəki azərbaycanlılar İmam Yaraliyevin şəhər rəhbəri olmasından narazıdırlar.

Xatırladaq ki, bundan öncə İmam Yaraliyevə qarşı Dağıstan Prezidenti Ramazan Abdulatipovun təşəbbüsü ilə cinayət işi qaldırılmışdı. Həmin zaman “Sadval” özünün əsas himayədarlarından hesab olunan Yaraliyevin müdafiəsinə qalxmışdı. Bunun ardınca isə Rusiya Prezidentinin Şimali Qafqaz üzrə nümayəndəsi Sergey Məlikovun Yaraliyevi sətiraltı müdafiə etməsi Abdulatipovun mövqelərini zəiflətmişdi. Məlikov və “Sadval”la yanaşı, məhşur ləzgi milyarder Süleyman Kərimovun da Yaraliyevə dəstəyi merdən narazı olan azərbaycanlıları çarəsiz şəkildə buraxmışdı. Bütün bu təzyiqlərdən sonra Dərbənd məhkəməsi Yaraliyevə qarşı cinayət işini ləğv etsə də, Dağıstan Prokurorluğu vəsatətin təmin olunması üçün yenidən məhkəməyə müraciət edəcəklərini bildirmişdi.

Dünən isə Dağıstan Anti-inhisar Xidməti yenidən Yaraliyevə qarşı iş qaldırıb.