Qəsəbə sakini: "Dünyaya qaz satan bir ölkədə bu cür hal təəcüb doğurur"

Sabunçu qəsəbəsi, Aydinbəyov küçəsi, ev 29-da yaşayan 1-ci qrup əlil Əsgər Qasımov qəsəbədə yaranmış qaz qıtlığı problemindən şikayətçidir.
Musavat.com-un əməkdaşına danışan 1-ci qrup əlil bildirib ki, bu günəcən həmin ərazidə qaz həmişə evlərə aşağı təzyiqlə verilib.
Onun sözlərinə görə, bu günlərdə qəsəbənin qazla təminatı ümumiyyətlə, kəsilib: "Dünyaya qaz satan bir ölkədə bu cür hallar təəcüb doğurur. İstilik sistemi də zəif olduğundan evləri qızdırmağa gücü çatmır. Yaxınlıqda yerləşən hamama isə qaz normal təzyiqlə verilir. Sakinlər arasında belə bir şayiə də var ki, qazların az təzyiqlə verilməsi, elə bu hamamla bağlıdır. Məcbur olub, işıqdan istifadə edirik. Nəticədə isə işıq pulu o qədər gəlir ki, onu ödəməyə imkanımız çatmır. Bildirirəm ki, 1-ci qrup əliləm. Ona görə də, ödənişin gecikməsində mənə güzəştə gedilməsini xahiş edirəm. Lakin heç kim məni dinləmək istəmir. Bəzən buna görə işqlarımızı da kəsirlər. Əgər paytaxt Bakıda vəziyyət bu yerdədirsə, rayonların durumunu fikirləşməyə belə, dəyməz".

Qəsəbə sakininin sözlərinə görə, dəfələrlə problemlə bağlı qaz istismarı sahəsinə müraciət edilsə də, nəticə etibarilə dəyişən heç nə yoxdur: "Bizə heç kim cavab vermək istəmir. "185" qaynar xəttinə, hətta İcra Hakimiyyətinə belə, müraciət etmişəm. Lakin bir kimsə bizim dərdimizlə maraqlanmaq istəmir".

http://musavat.com