XX əsr Azərbaycan tarixinin ən qanlı səhifəsi Xocalı soyqırımından 24 il ötür. Bu faciə öz dəhşəti ilə Xatın və Xirosimada baş vermiş amansızlığın təkrarıdır. Qəddarlığı ilə seçilən Xocalı soyqırımı təcavüzkar erməni millətçiləri tərəfindən etnik azərbaycanlılara qarşı törədilmişdir.
Yeddi min əhalisi olan Xocalı şəhəri yer üzündən silinmiş, əhalisi isə xüsusi amansızlıqla qətlə yetirilmiş (613 nəfər, o cümlədən 63 uşaq, 106 qadın və 70 qoca) və (1275 nəfər) əsir götürülmüşdür. Çoxlu sayda insanlar doğma yurd-yuvasından didərgin düşmüş və hələ də qaçqınlıq həyatı yaşayırlar.
Bu soyqırımın günahkarları hələ də öz layiqli cəzalarına çatmayıblar. Azərbaycan Kommunist partiyası tələb edir ki, Qarabağ faciəsinin əsas səbəbkarı Mixail Qorbaçov, Xocalı soyqırımının baiskarları Serj Sargsyan və Robert Koçaryan, habelə bu cinayətin başqa iştirakçıları məhkəmə qarşısına çıxarılıb layiqli cəzalarını alsınlar. Bu cinayət cəzasız qalmamalıdır!
Azərbaycan kommunistləri və Azərbaycan xalqı Xocalının dinc əhalisinə qarşı törədilmiş bu dəhşətli cinayəti heç zaman unutmayacaq! AKP dünya ictimaiyyətini Ermənistanın işğalçı siyasətini pisləməyə, Azərbaycan ərazilərinin və əsirlikdə olan Azərbaycan vətəndaşlarının qeyd-şərtsiz azad edilməsini tələb etməyə çağırır.

Azərbaycan Kommunist Partiyası Mərkəzi Komitəsinin sədri
Gülnisə Məhsimova

26 fevral 2016 il