Elvin Paşayev narkotik maddələrin satışında ittiham olunur; həbslə bağlı apellyasiya şikayəti veriləcək; ailəsi onunla görüşə bilmir


Vəkil Nemət Kərimli: “Dərsə gedən müəllimin üstündən narkotik çıxar?”

Müsavat Gənclər Təşkilatının və partiyanın Qubadlı təşkilatının üzvü Elvin Paşayev yanvarın 23-də həbs edilib. O, narkotik maddələrin satışında ittiham edilib və barəsində 4 aylıq həbs-qətimkan tədbiri seçilib.

Sumqayıt Dövlət Universitetinin məzunu olan, “Hədəf” hazırlıq kursunda müəllim işləyən müsavatçı gəncin hazırda Baş Mütəşəkkil Cinayətkarlıqla Mübarizə İdarəsində saxlanıldığı ehtimal olunur. Onun barəsində məlumat almaq mümkün olmur. Ancaq E.Paşayevin həbsinə səbəb kimi, onun sosial şəbəkələrdə yazdığı statuslar göstərilir.

Vəkil Nemət Kərimli musavat.com-a açıqlamasında hüquqlarını müdafiə etdiyi şəxslə hələ də görüşə bilmədiyini bildirib: “Elvin yanvarın 23-də saxlanılıb. Ona qarşı ittihamda göstərilir ki, guya dərsdən çıxarkən Sumqayıt ərazisində həbs edilib. Üstündən 65 qram tiryək tapılıb. Bu, tamamilə absurd ittihamdır. O, şənbə günü dərsə gedərkən saxlanılıb. Bu ittihama kimsə inana bilməz. Çünki dərsə gedərkən saxlanılıb. Dərsə gedən müəllimin üstündən narkotik çıxar? O, həbs edildiyi gün valideynləri “102 xidməti”nə və digər aidiyyatı orqanlara məlumat veriblər. Qanunda göstərilir ki, həbs edilən şəxsə öz yaxınları ilə əlaqə saxlamaq üçün şərait yaradılmalıdır. Onun barəsində yanvarın 25-də Nərimanov Rayon Məhkəməsində həbs-qətimkan tədbiri seçilib. Qərarda onun nə üçün həbs edilməsi belə, əsaslandırılmayıb. Yanvarın 26-da Elvinin valideynləri müstəntiq olan Hacı adlı şəxslə görüşüblər. O, deyib ki, oğlunuz narkotik maddənin aludəçisi olub. Qərardan apellyasiya şikayəti hazırlamışıq. Məhkəməyə təqdim edəcəyik. Elvin həbs edildikdən sonra ona işgəncələrin verilib-verilməməsi ilə bağlı heç bir məlumatımız yoxdur. Çünki onunla hələ görüşməmişəm. Həftənin birinci günü görüşməyə cəhd edəcəm. Ondan sonra geniş məlumat verəcəm. Elvin özünü təqsirli bilmir”.

Müsavat Gənclər Təşkilatının İdarə Heyətinin üzvü Əbülfəz Sadıqbəyli E.Paşayevin həbsindən əvvəl izlənildiyini bildirdi: “Elvinin valideynləri bizə yanvarın 23-də məlumat verdilər ki, o, evdən çıxıb və barəsində heç bir məlumat yoxdur. Onun iş yerindən də evlərinə zəng ediblər ki, Elvin işə gəlməyib. Bundan sonra ailəsi aidiyyatı orqanlara müraciət edib. İki gün ərzində onun haqqında məlumat almaq mümkün olmayıb. Yanvarın 27-nə qədər “Bandotel”də saxlanılırdı. Ondan sonra məlumatımız yoxdur. Təcridxanaya köçürülə də bilər. Elvin ailəsi ilə əlaqə saxlaya bilməyib. Onun həbsinin səbəbləri məlum deyil. Amma son günlər Sumqayıt Dövlət Universitetindəki korrupsiya halları ilə bağlı yazılar yazırdı. Ehtimal olunur ki, ona görə həbs edilib”.

Musavat.com