Qarabağdakı qondarma rejimin nümayəndələri Rusiya sülhməramlı missiyası vasitəsilə Azərbaycan tərəfinə görüşün keçirilməsi barədə təklif göndərib.

Qondarma rejimin nümayəndəsi, özünü “parlament”in deputatı adlandıran Artur Arutyunyanın “Azadlıq” radiosunun Ermənistan bürosuna verdiyi məlumata görə, onlar Azərbaycan nümayəndə heyəti ilə yollardan tutmuş qaza qədər demək olar ki, bütün məsələləri müzakirə etmək istəyirlər. Arutunyan əlavə edib ki, humanitar məsələlər elektrik enerjisinin, qaz təchizatının bərpası, bağlanmış yolun açılması üçün vacib olan infrastruktur və humanitar məsələlərlə bağlıdır. Lakin ermənilər təmasın Xocalı şəhərində, yəni Rusiya sülhməramlı kontingentinin dislokasiya yerində keçirməyi təklif edib. Xatırladaq ki, Azərbaycan Respublikasının Prezident Administrasiyası bir müddət öncə Qarabağın erməni ictimaiyyətinin nümayəndələri ilə ikinci görüşün Bakıda keçirilməsi ilə bağlı təklif irəli sürüb. “Azərbaycan Respublikası Prezidentinin Administrasiyası martın 1-də Xocalı şəhərində keçirilmiş görüşün və martın 13-də təqdim edilmiş dəvətin davamı olaraq Qarabağın erməni ictimaiyyətinin nümayəndələrini reinteqrasiya, həmçinin Qarabağda infrastruktur layihələrinin icrası məsələlərinin müzakirəsi məqsədilə aprel ayının birinci həftəsi Bakı şəhərində görüşün keçirilməsini bir daha təklif edir”, - deyə məlumatda bildirilib.

DİA.AZ-ın məlumatına görə, politoloq Cümşüd Nuriyev Cebhe.info-ya açıqlamasında bildirib ki, sözügedən təmasın baş tutması erməni icmasının üzvlərinin Azərbaycan vətəndaşlığını qəbul etməsi üçün yeni imkanlar yarada bilər.

“Məndə olan məlumata görə, 10 minə yaxın erməni artıq Azərbaycan vətəndaşlığını qəbul etmək istəyir. Erməni sosial mediasında bəziləri bu adamları ağıllı adlandırır, bəziləri satqın hesab edir. Bütün hallarda münaqişələr sülhlə başa çatıb. Hətta İngiltərə ilə Fransa arasındakı 100 illik müharibə də sülhlə qurtarıb. Azərbaycan ermənilərlə saziş imzalamayacaq. Bu görüşdə razılaşma olmalıdır. Ermənilər Azərbaycan Konstitusiyasının maddələrini qəbul etdiklərini bəyan etməlidir. Azərbaycan tərəfi də bunun qarşılığında digər vətəndaşlara verdiyi hüquq və səlahiyyətlərin ermənilərə də aid olduğunu bildirməlidir. Bu, proseslərin xalq diplomatiyası çərçivəsindən çıxaraq dövlət səviyyəsinə qalxması deməkdir. Ona görə də baş tutması ehtimalı daha yüksəkdir”.

Qeyd edək ki, Azərbaycan hərbi cinayətlərdə iştirak etmiş rejim nümayəndələri ilə görüşməyəcəyini əvvəlcədən bəyan edib. Bu baxımdan, terrorçu rejimin nümayəndələrinin Azərbaycan nümayəndələri ilə görüşmək təklifi siyasi hiylə kimi də şərh edilir. Yəni rəsmi Bakının cinayətkarlarla təmasdan imtina edəcəyini bilən ermənilər bundan istifadə edərək Azərbaycanın sülhə qarşı olduğu barədə saxta kampaniya qura bilər. Cümşüd Nuriyev hesab edir ki, qondarma rejimin rəhbərliyi belə addım atmağa cürət edə bilməz: “Çünki onlar belə addım atarsa, Ermənistan müxalifəti, “Daşnaksütyun” və ASALA onların həyatına son qoyar. Ona görə də bu ehtimal inandırıcı görünmür”. Ekspert onu da bildirdi ki, kommunikasiyanın Xocalıda baş tutması mümkündür: “Görüşün Xocalıda keçirilməsi ermənilərin inamsızlığı ilə bağlıdır. Ermənilər o qədər cinayət törədiblər ki, özləri öz kölgələrindən qorxurlar. Halbuki, beynəlxalq normalara görə, sülhyaradıcı istənilən şəxsə qarşı heç bir dövlət təhlükə yaratmaz, Azərbaycanın da belə niyyəti yoxdur. Sadəcə olaraq, ermənilərin xoflu olması onların xainliyindən irəli gəlir”.