“Qarabağ erməniləri Azərbaycanın tərkibində daha yaxşı vəziyyətdə olacaqlar. Bunu Azərbaycan prezidenti İlham Əliyev X Bakı Qlobal Forumunun açılışındakı nitqində bir daha diqqətə çatdırdı. Azərbaycan rəhbərinin sözləri uzun illər türkofobiya təbliğatının, əsassız ərazi iddialarının və müharibənin zəhəri ilə zəhərlənmiş ermənilərin şüuruna addım-addım, eyni zamanda çox çətinliklə nüfuz etməyə başlayır”.

Bunu Reyting.az-a Milli Məclisin deputatı, sabiq dövlət müşaviri Rasim Musabəyov deyib.

R. Musabəyov xatırladıb ki, martın 6-da Qarabağ ermənilərinin separatçı xuntasının başçısı şəriklərinin guya “Təhlükəsizlik Şurası” adlandırılan genişləndirilmiş iclasında Azərbaycan Respublikasının hüquqi və iqtisadi məkanına reinteqrasiya imkanlarını etiraf edib:

“Araik Arutyunyan deyib ki, bizim seçimimiz var: ya seçdiyimiz mübarizəni davam etdirək, ya da cəmiyyətdə elə bir əhval-ruhiyyə yaranıbsa, Azərbaycanın təqdim etdiyi təklifi qəbul edək, o zaman insanların öz səlahiyyətləri çərçivəsində öz çıxışlarını söyləmək imkanı var. Vətəndaş hüquqları və seçdiyimiz yolun səhv olduğunu söyləmək, bu hissləri rəsmiləşdirmək, yeni hökumət qurmaq.

Gözlənildiyi kimi, “barışmazlar” çevrələrindən yüksək təslim ittihamları səsləndi, Araikin ətrafı tərəfindən yöndəmsiz izahatlar eşidildi, lakin hələ də az adam mövcud vəziyyəti və separatçılar üçün qaranlıq olan perspektivləri rasional qiymətləndirməyə cəsarət edə bilmir. Baxmayaraq ki, alternativlər göz qabağındadır”.

R. Musabəyov əlavə edib ki, Bakının təkliflərinin rədd edilməsi Qarabağ ermənilərini Ermənistandan və diaspordan gələn yardımlar hesabına ümidsiz həyata məhkum edir: “İndi separatçıların büdcəsinin 90 faizdən çoxu İrəvandan dotasiya olunur, qaz və işıq Ermənistandan gəlir, taxıl və əsas ərzaq məhsulları da xaricdən gətirilir. Sənaye praktiki olaraq yox dərəcəsindədir. Davam edən mühasirə vəziyyəti və nəqliyyat kommunikasiyaları ilə bağlı çətinliklər səbəbindən turizmi inkişaf etdirmək mümkün deyil. Qeyri-müəyyən statusa malik regionun iqtisadiyyatına xarici investisiyalar gözlənilmir. Hətta yerli ermənilər öz əmanətlərini Ermənistana və ya Rusiyaya yatırmağı öz evlərinə yatırmaqdan daha effektiv hesab edirlər. İşsizlik, perspektivin olmaması onsuz da azalmış əhalini mühacirətə sövq edəcək. Bu separatçı anklavın əzab-əziyyəti hələ bir müddət də davam edə bilər, lakin çöküş qaçılmazdır və ağlı başında olan insan üçün aydındır. Odur ki, ümumi vətəndə birgə yaşamağın düsturunu tapmaq üçün Bakı ilə substantiv dialoqa başlamağın vaxtı çatıb”.