Rusiya Ukraynaya təcavüz etdikdən bəri ABŞ, Avropa İttifaqı və digər ölkələrin sanksiyalarına məruz qalıb.

Bu sanksiyalar Rusiyanı siyasi və iqtisadi cəhətdən beynəlxalq aləmdən təcrid etməsi ilə bərabər ölkədə onsuz da acınacaqlı olan sosial-iqtisadi vəziyyəti daha da ağırlaşdırıb, ölkənin iqtisadiyyatında ciddi problemlər yaradıb və bir xarici şirkətləri ölkəni tərk etməsinə gətirib çıxarıb.

Rusiyalı milyarder Oleq Deripaska Krasnoyarskda keçirilən iqtisadiyyat forumunda deyib ki, əgər Rusiyaya xarici investorlar gəlməsələr, ölkə artıq gələn il pulsuz qalacaq:

"Pulla bağlı artıq ciddi problemlər var. Ona görə də biznes yarpaq kimi əsir”.

Milyarderin sözlərinə görə, ölkədə iqtisadi vəziyyət “çox mürəkkəb və qeyri-müəyyəndir” və ən azı 2025-ci ilin ortalarınadək belə qalacaq.

Deripaska çıxışında habelə məmurların və güc strukturları əməkdaşlarının sayını “üç-dörd dəfə” ixtisar etməyi təklif edib.O bunların hazırkı sayının onsuz da “sanksiyaların ağır daşı” altında olan ölkəyə “ciddi yük” olduğunu bildirib.

Ağır iqtisadi-sosial vəziyyət nəinki Rusiya vətəndaşlarının, hətta xarici vətəndaşların başqa ölkələrə üz tutmasına səbəb olub. Artıq uzun müddətdir ki, sosial şəbəkələrdə Rusiyada yaşayan azərbaycanlıların yaxın zamanda ölkəmizə böyük köçünün gözlənilməsi ilə bağlı məlumatlar dolaşır.

DİA.AZ-ın məlumatına görə, məsələ ilə bağlı Cebhe.info-ya şərhində iqtisadçı Natiq Cəfərli bildirib ki, Rusiyada yaşayan azərbaycanlıların ölkəyə kütləvi şəkildə geriyə dönüşü ilə bağlı məlumatlar hələ də öz təsdiqini tapmayıb.

“2009-2010-ci illərdə, hətta 2014-2016-ci illərdə belə Rusiyada ağır iqtisadi böhran hökm sürürdü, rublun dəyəri kəskin düşmüşdü, iqtisadiyyatda geniş daralmalar müşahidə olunurdu. Bütün bunlara rəğmən azərbaycanlıların kütləvi şəkildə ölkəyə qayıtmasına müşahidə etmədik. Çünki istər-istəməz Rusiya bazarında fürsətlər və imkanlar genişdir. Azərbaycanın daxilində isə biznes imkanları azdır, iş yerləri yaratmaq çox çətindir. Sistemin yaratdığı şərait, rəqabət mühitinin şəffaf olmaması, habelə kreditlərin az olması və bazarın darlığı ölkəmizdə azad ticarətin imkanlarını məhdudlaşdırır və biznes sahələrinin inkişafına əngəl yaradır. Bütün bu səbəblərə görə azərbaycanlılar Rusiyada qalmağa tərcih edirlər.

Artıq bir ildir ki, Ukraynada müharibə davam edir, amma soydaşlarımızın ölkəyə geri dönüşünü görmürük. Rusiyada çoxsaylı sosial-iqtisadi problemlər yaşansa belə, azərbaycanlı sahibkarlar və biznesmenlər Belarusa, Qazaxıstana, Özbəkistana və digər Mərkəzi Asiya ölkələrinə köçməyi üstünlük verirlər. Məsələn, Qazaxıstan və Rusiyanın Gömrük İttifaqında olması biznes imkanlarını daha da genişləndirir. Azərbaycanlı biznesmenlər sanksiyalara məruz qalan məhsulları Qazaxıstan üzərindən Rusiyaya ixrac edib pul qazana bilərlər. Belə olan halda onlar Azərbaycana qayıtmaq istəmiyəcəklər”.

İqtisadçı Asif İbrahimov da Natiq Cəfərli ilə eyni fikirləri bölüşüb.

“Düzdür, Rusiyanın iqtisadiyyatında xeyli problemlər yaşanmaqdadır, amma kəskin şəkildə tənəzzülə məruz qalmayıb. Rusiyanın o qədər təbii ehtiyatları, qaz və neft reservləri, digər daxili sərvətləri var ki, bütün bunlar iqtisadiyyatı ayaqda saxlayır. Bu baxımdan, Rusiyada hələ də insanlarımız öz ticarəti və biznesi ilə məşğuldurlar. Düşünmürəm ki, yaxın üç və altı ay ərzində həmvətənlərimiz Rusiyanı tərk edib Azərbaycana qayıtsınlar. Ola bilər ki, müəyyən sosial məsələlərdən və səfərbərlikdən irəli gələn səbəblər üzündən onlar ölkəmizə hissə-hissə qayıda bilərlər. Amma kütləvi şəkildə qayıdış qeyri-mümkündür”.