Ermənistanın Baş naziri Nikol Paşinyan Avropa İttifaqının Ermənistandakı mülki monitorinq missiyasının fəaliyyətini tənzimləyən sazişin imzalanacağının anonsunu verib.

Paşinyan bu barədə o, Almaniya kansleri Olaf Şoltsla birgə keçirdiyi mətbuat konfransında bildirib.

“Hazırda Avriopa İtifaqının Ermənistandakı mülki missiyası ilə bağlı məsələlər qarşılıqlı rəsmi məktublarla tənzimlənir. Amma missiyanın fəaliyyətini tənzimləyən sazişin gələcəkdə müzakirə etmək və müqavilə imzalamaqla razılaşmamız var”, - Paşinyan bildirib.

Qeyd edək ki, ötən ilin oktyabr ayında Ermənistana göndərilmiş birinci missiya Avropa Parlamantinin qərarı əsasında fəaliyyət göstərib. Yəni tərəflər arasında saziş olmayıb. Ancaq Paşinyan bu müqavilənin hansı zərurətdən irəli gəldiyini açıqlamayıb.

DİA.AZ bildirir ki, politoloq Yeganə Hacıyeva Cebhe.info-ya açıqlamasında bu sazişin səbəbini onun daha geniş mahiyyət daşıması ilə izah edib:

“Saziş Avropa İttifaqı ilə Ermənistan arasında hərbi müqavilə olacaq. Yəni bu yalnız mülki missiyanı deyil, həm də genişləndirilmiş missiyanı özündə ehtiva edir. Bu sənədin imzalanması bölgədə dövri olaraq hərbiləşdirilmiş missiyanın yerləşdirilməsi üçün hüquqi baza yaradır.

Bu da Ermənistanla Avropa İttifaqı arasında hərbi əməkdaşlığı legitimləşdirmək cəhdidir. Hazırda bunu mülki missiya kimi təqdim etsələr də burada başqa məqamlar var. Avropa İttifaqı ilə hər hansı saziş mümkün deyil. Çünki Avropa İttifaqının hərbi təsisatları yoxdur. Mülki missiyanın Ermənistana yerləşdirlməsinin səbəbi onun yayındırıcı olması məqsədi daşıyır.

Həmçinin, Avropa İttifaqının qanunvericiliyində, sənədlərində və mexanizmlərində bununla bağlı hüquqi əsas mövcud deyil. Əks halda, mülki missiya adı altında Ermənistana gətirilmiş həmin qrupu təhlükəsizlik məqsədilə hərbi statusla orada yerləşdirə bilərlər. Ermənistanın addımları bununla yekunlaşmır. Ermənistanın başqa fəaliyyəti də var.

Belə ki, Ermənistanın Azərbaycanla sərhəddini mülki missiya müşahidə edir. Həmçinin, bu günlərdə Ermənistan tərəfdən ABŞ-ın gömrük təhlükəsizliyi xidmətlərinin nümayəndələri də iştirak edib. Onların fəaliyyət prinsiplərindən biri də sərhəddə gömrük təhlükəsizliyinin əsasını texniki və digər vasitələrlə formalaşdırılmasıdır. Amma bu, necə adlandırılmasından asılı olmayaraq hərbi təyinatlı təşəbbüslərdir.

ABŞ Ermənistanın Azərbaycan və Gürcüstanla sərhəddə gömrük təhlükəsizliyinin təşkilinə dəstək verəcəyi barədə məlumatları paylaşıb. Yəni Cənubi Qafqazda Rusiyanın forpostu olan Ermənistan indi Moskvanın nəzarətindən çıxaraq müxtəlif sazişlər adı altında Qərb institutlarını ölkəyə gətirmək istəyir. Amma bu, Ermənistana öz işğalçı niyyətini həyata keçirməyə kömək etməyəcək.

Rəsmi İrəvanın əsas məqsədi Ermənistanın işğalçılıq siyasətinə Qərbin dəstəyini əldə etməkdir. Lakin nə ABŞ, nə Avropa İttifaqı buna yol verməz. Ermənistan isə ümid edir ki, ilkin mərhələdə təxribatlar törətməklə sonra prosesi öz xeyrinə dəyişə biləcək”.