Rusiya Xarici İşlər Nazirliyi Vaşinqtonu Ermənistan-Azərbaycan münaqişəsinin nizamlanma prosesini pozmaqda ittiham edir.

Reyting.az xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi həftəlik brifinqdə danışıb.

“Ermənistan-Azərbaycan münaqişəsinin nizamlanması səylərinin qarşısını ABŞ başda olmaqla, Qərb ölkələri alıb”,- deyən M. Zaxarovanın sözlərinə görə, məhz bu səbəbdən ATƏT-in Minsk qrupu formatı “tarixin zibilliyinə” göndərildi.

“Minsk qrupunun amerikalı və fransalı həmsədrləri 2022-ci ilin fevralında uydurma bəhanələrlə rusiyalı həmkarları ilə əməkdaşlığı dayandırandan sonra bu format yararsız vəziyyətə gətirildi. Onlardan bununla bağlı aydın, ağlabatan heç bir izahat və ya açıqlama eşitmədik. Bunu nəzərə alaraq, biz aramızdakı mövcud razılaşmalara söykənərək, üçtərəfli format çərçivəsində diqqətimizi Bakı və Yerevana yardım göstərmək üzərində cəmlədik”,- Zaxarova bildirib.

P.S. Bu məqamda xanım Zaxarovaya xatırlatmaq istərdik ki, məlum münaqişəni həll etmək missiyasını boynuna götürən ATƏT-in Minsk qrupunun üç həmsədrindən biri kimi, Rusiya təmsilçisi də 26 il ərzində (Minsk qrupunun həmsədrlik institutu 1994-cü ilin dekabrında ABŞ və Rusiyanın iştirakı ilə yaradıldı, Fransa qrupa bir il sonra qoşuldu) Bakıya və İrəvana etdiyi onlarca deyil, bəlkə də minlərlə səfərlərində sadəcə rəsmi qəbullarda boş və bəlağətli siyasi ritorika və qeyri-rəsmi hissədə milli mətbəximizin kabab təamları ilə vaxtı uzatmağa, münaqişəni uzun müddətə dondurmağa çalışdılar. Minsk qrupunun “tarixin zibilliyinə” göndərilməsinin əsas səbəbi də, Vaşinqtonun yersiz müdaxiləsi yox, məhz bu oldu.