Rusiya "sülhməramlı" missiyasına BMT-nin beynəlxalq mandatının verilməsi istiqamətində addımlar atılır.

Moderator.az xəbər verir ki, bu haqda Ermənistan parlamentinin müdafiə və təhlükəsizlik məsələləri daimi komissiyasının sədr müavini Armen Xaçatryan “Joqovurd” qəzetinə müsahibəsində danışıb.

"İndi həm Ermənistan, həm də Artsax hakimiyyəti bu gündəm üzərində fəal işləyir" - A.Xaçatryan belə deyib.

Azərbaycan torpağındakı separatçı-terrorçu rejimin qanunsuz "xarici işlər naziri" vəzifəsini icra edən David Babayan belə bir prosesə doğru müəyyən addımların atıldığını bildirib.

“Hələ dəhlizin bağlanmasından əvvəl biz artıq müvafiq təkliflər vermişdik, çünki başa düşürdük ki, sülhməramlıların beynəlxalq BMT mandatı olmasa, belə problemlər yarana bilər. Mandat onlara təkcə sülhməramlı deyil, həm də sülhün mühafizəsi qüvvəsi olmağa imkan verir... Rusiya sülhməramlılarının beynəlxalq BMT mandatı olsa, hər şey aydın olacaq. Bilirsiniz, məsələn, Kosovoda bir qrup insanın gəlib hansısa yolu bağlaması bir növ qeyri-mümkündür, çünki beynəlxalq mandata malik sülhməramlılar onları dərhal dağıdacaq və bunu güc tətbiq etməklə edəcəklər", — deyə separatçı məmur həyasızcasına çərənləyib.