ABŞ Dövlət Departamentinin Qafqaz danışıqları üzrə baş müşaviri Filip Riker noyabrın 28-29-da Azərbaycanda səfərdə oldu. Dövlət başçısı İlham Əliyevin qəbulunda olan Filip Riker xarici işlər naziri Ceyhun Bayramovla da görüşüb. Görüşdə Azərbaycan-Ermənistan normallaşma prosesi, Vaşinqton görüşü də daxil sülh müqaviləsinin elementləri üzrə aparılan ikitərəfli danışıqlar və bundan irəli gələn məsələlər, kommunikasiyaların açılması və delimitasiya prosesi üzrə cari vəziyyət müzakirə olunub. Riker Amerikanın Azərbaycan və Ermənistan arasında birbaşa danışıqlara davamlı dəstəyini vurğulayıb. Daha sonra mətbuata açıqlama verən Riker sülh prosesinin asan olmadığını qeyd etsə də, sülh danışıqları zamanı əldə edilən impulsun saxlanıla biləcəyini deyib: "Hər iki ölkə tərəfindən real və cəsarətli addımları müşahidə edirəm. Mən indi Bakıdayam, buradan da Tbilisiyə və İrəvana səfər edəcəm". Məlumat üçün qeyd edək ki, Azərbaycan-Ermənistan sülh danışıqları əsasən 2 platformada - Soçi və Brüssel formatı müstəvisində gedir. Son olaraq buna "Vaşinqton sənədi" adı verilən üçüncü format da daxil edilib. Lakin hələlik heç bir platformada real irəliləyiş gözə dəymir.
ABŞ rəsmisinin səfərini və açıqlamasını "Şərq"ə dəyərləndirən sabiq xarici işlər naziri Tofiq Zülfüqarov bildirib ki, Azərbaycan və Ermənistan tərəfi arasında sülh danışıqlarının Soçi formatında müəyyən aktivlik var. Politoloq xatırladıb ki, Rusiya Prezidenti V.Putin son günlərdə bir neçə dəfə ardıcıl Bakıya zəng edib, dövlət başçısı İlham Əliyevlə müzakirələr aparıb. Eyni zamanda Putin Ermənistan Baş naziri Nikol Paşinyanla da əlaqə saxlayıb: "Brüssel formatı da Paşinyanın Fransa ilə bağlı tələbinə görə problemlə üzləşdi. Vaşinqton formatı iki ölkənin xarici işlər naziri müstəvisindədir. Bu da praktiki sənədlər üzərində fikir mübadiləsidir. Həmçinin Paşinyan təklif edir ki, yekun sülh müqaviləsindən əvvəl çərçivə sazişi imzalansın və mübahisəli detallar sonraya saxlanılsın. Əlbəttə, bu, rəsmi Bakı üçün problemlidir. Çünki çərçivə sazişində əsas prinsiplər təsbit olunacaq, amma icrası həyata keçməyəcək. Məsələn, İrəvan sözdə "ərazi bütövlüyünün qarşılıqlı şəkildə tanınmasından" danışsa da, Qarabağı Azərbaycanın tərkibində görmək istəmir. Faktiki olaraq, Azərbaycanın ərazi bütövlüyünü tanımadıqlarını bəyan edirlər. Yaxud deyilir ki, bölgədə kommunikasiyalar açılsın, ancaq İrəvan Zəngəzur məsələsində "yox" deyir. Ermənistan rəhbərliyi "çərçivə sazişi" dedikdə bəyannamə formasında bir sənədi nəzərdə tutur. Böyük ehtimal Filip Rikerin optimizmi bu məqamla bağlıdır. Lakin bu məsələnin həll edəcəyi heç nə yoxdur".
T.Zülfüqarov vurğulayıb ki, hansısa prinsiplərin formal təsbit olunması bizim üçün o qədər də maraqlı deyil: "Rəsmi Bakı konkret həllə doğru addımlar, qərarlar istəyir. Biz müəyyən olunmuş prinsiplərin icrasını tələb edirik. Ermənistan sənəddə yer alan əsas prinsipləri dəstəklədiyini desə də, gələn ilin dövlət büdcəsində Qarabağ separatçılarına maliyyə ayrılmasına qərar verirlər. Çox güman ki, Brüssel görüşü öncəsi Paşinyanın "Makron tələbi" ilə çıxış etməsi də Fransa ilə razılaşdırılmışdı. Məqsəd rəsmi Bakı ilə danışıqlar prosesini dalana dirəmək, hər hansı irəliləyiş, razılaşma olmasına imkan verməməkdir. Hiss olunur ki, Makron Avropa İttifaqının bu prosesdə müsbət rol oynamasını istəmir və buna mane olur. Fransa rəhbərliyinin əsas məqsədi odur ki, Avropa İttifaqı Azərbaycan əleyhinə sanksiya qəbul etsin, təzyiq göstərsin. Burada Aİ daxilindəki proseslər, qarşıdurma da önəmlidir. Azərbaycan qaz imkanları ilə Cənubi Avropa ölkələrinin xilaskarına çevrilməkdədir. İtaliya və Balkan ölkələri Azərbaycanla əməkdaşlığa müsbət yanaşırlar. Bu da Fransanı narazı salır və hətta İtaliya ilə əlaqələrə də mənfi təsir göstərir. Fransa özü böhranlı vəziyyətdədir və bir çox yerə əl atsa da, enerji ehtiyatlarını təmin etməkdə çətinlik çəkir. O baxımdan, sözün açığı, Brüssel formatı ilə bağlı gözləntilərim pozitiv deyil".