“Ermənilər yeni təxribatlar törədə bilər. Bunun Rusiyanın təsiri altında baş verməsi də mümkündür. Bu gün İrəvanda Nikol Paşinyana qarşı real müxalif qüvvə “Qarabağ klanı”nın təmsilçiləridir. Onlar uzun illər hakimiyyətdə olublar və Ermənistan ordusunun daxilində də Paşinyanı sevməyən zabitlər var ki, onlar Azərbaycana qarşı təxribatlara əl ata bilərlər. Məncə, həmin qüvvələr vəziyyəti gərginləşdirməyə çalışacaqlar ki, Azərbaycanla Ermənistan arasında sülh danışıqları pozulsun”. DİA.AZ xəbər verir ki, bunu Reyting.az-a hərbi ekspert Azad İsazadə deyib.

Onun sözlərinə görə, Ermənistanla-Azərbaycan arasında sülh müqvailəsi imzalanana qədər gərginlik olacaq və ermənilərin təxribata əl atması istisna edilmir: “Amma mən bildiyim qədər, Azərbaycan tərəfi belə təxribatların qarşısını almağa hazırdır. Düşünürəm ki, təxribatçı ermənilərə qarşı üç günlük hərbi əməliyyat xeyrimizə ola bilər. Atəş başlasa, aydındır ki, bizimkilər cavab zərbəsi endirəcək və bir qədər də irəliləyəcəklər. Deməli, növbəti danışıqlarda bizim arqumentimiz daha çox olacaq. Sadəcə, bundan hələlik ona görə istifadə etmirik ki, müqaviləni və razılaşmaları pozmayaq. Yox, əgər onlar pozacaqlarsa, Fərrux yüksəkliyindəki hal təkrarlanacaq. Fərrux istiqamətində də ermənilər təxribat etdilər, atəş açdılar. Bizimkilər də qısa əməliyyat keçirib, Azərbaycana məxsus həmin ərazini nəzarətə götürdü. Qısası, danışıqlar getməlidir. Əgər onlar bunu istəmirlərsə, o zaman biz necə hesab ediriksə, o cür də hərəkət edəcəyik”.

Ekspert indi ermənilərin hərbi imkanlarının da reallıq da olmadığını deyib: “Əvvəla, onların hərbi texnikası azdır. Həm də onlar bilirlər ki, biz bu texnika ilə necə rəftar etmişik. Eyni zamanda Ermənistan ordusunda insan resursları zəifdir. Həmçinin motivasiya, əhval-ruhiyyə aşağıdır. Onlar reallıqda Azərbaycan Ordusundan qorxurlar. Üstəlik də coğrafi əhəmiyyətə malik yüksəkliklər bizim nəzarətimizdədir.

Bundan başqa, indi Rusiyanın onlara real dəstək və kömək etmək imkanı yoxdur. Əksinə, Gümrüdəki hərbi bazanın bir hissəsini Ukraynaya aparıblar. Elə Qarabağdakı sülhməramlıların da müəyyən hissəsini Ukraynaya göndəriblər. Odur ki, indi Ermənistanda Rusiyanın real güc və qüvvəsi azdır”.