Azərbaycan Xarici İşlər Nazirliyinin Ermənistanla sülh sazişi imzalamaq üçün irəli sürdüyü 5 təklifdə sərhədlərin delimitasiyası və demarkasiyasına dair şərt də öz əksini tapıb.

Azərbaycan sərhədlərin 1970-ci il Sovet xəritələri əsasında dəqiqləşdirilməsini təklif edir.

Qeyd edək ki, bir müddət öncə Rusiya delimitasiya və demarkasiya prosesinin 1974-cü il xəritəsi əsasında aparılacağına dair rəsmi açıqlama yaymışdı. Sərhədlərin çəkilməsi topoqrafik xəritələr əsasında həyəta keçirildiyindən, hansı əraziləri əhatə edəcəyini dəqiq söyləmək çətindir.

Çünki topoqrafik xəritələr məxfi hərbi sənəd sayılır. Lakin təxmini məlumat əldə etmək üçün 1970-ci ildə SSRİ Nazirlər Soveti yanında Geodeziya və Kartoqrafiya Baş İdarəsinin nəşr etdiyi Azərbaycan SSR-nin xəritəsini əldə etdik. V.S.Juravlyovun redaktorluğu ilə 1970-ci il sentyabrın 29-da nəşrə verilmiş xəritədə Azərbaycan SSR-in ərazi ölçüsü göstərilməsə də, sonrakı illərlə müqayisədə xeyli böyük olduğu görünür. Məsələn, xəritədən 1970-ci ildə Qazax rayonunun Ermənistanla sərhəd bölgəsində cəmi iki anklavın olduğunu görmək olar. 1984-cü ildə isə SSRİ Nazirlər Sovetinin qərarı ilə Qazax rayonunun 1675 hektar torpaq sahəsinin Ermənistana verilməsindən sonra anklavların sayı 5-ə çatdı.

Yaxud sərhədlərin demarkasiyası 1970-ci il xəritəsi əsasında aparılsa, Laçın rayonu ərazisində yerləşən Qaragöl gölünün 1984-cü ildə ermənilərin istifadəsinə verilmiş 84 faiz hissəsi geri qaytarıla bilər. Bununla da Azərbaycan digər rayonlarda da Sovet dövründə qanunsuz olaraq Ermənistana verilmiş xeyli torpaq sahəsini geri almaq hüququ əldə edəcək. Hətta erməni kartoqraf Ruben Qaliçyan ötən il verdiyi açıqlamada sərhədlərin 1970-ci illər xəritələri əsasında müəyyənləşəcəyi halda Ermənistanın ərazisinin ən azı 1500 kv.km kiçiləcəyini bildirmişdi. //cebhe.info//